Haberá novas restricións na praza de abastos de Pontevedra. O departamento de Promoción económica, co visto e prace da Xunta de Galicia, acordou extremar as precaucións ante a situación de emerxencia sanitaria provocada polo coronavirus.
Así, por exemplo, entre estas medidas extraordinarias destaca que o acceso ao mercado estará restrinxido e non poderá haber nas súas instalacións máis de sesenta persoas ao mesmo tempo. Esta afluencia estará controlada a diario por un vixiante de seguridade.
Os clientes terán que gardar ademais unha distancia de seguridade de dous metros entre eles e todos os vendedores deberán usar obrigatoriamente luvas de protección.
Por todo o mercado haberá carteis informativos para lembrar aos usuarios e aos clientes a necesidade de adoptar as medidas de hixiene e precaución que recomendan as autoridades.
A estreiteza dos corredores de mercado impedirá, iso si, que se estableza unha distancia dun metro, como noutros establecementos de alimentos, entre o cliente e o posto.
Colocar unha cinta diante de cada posto dificultaría en exceso, segundo os técnicos municipais, o paso dos clientes polo mercado.