A comarca do Salnés ve como se endurecen as medidas restritivas debido á preocupante situación da evolución da pandemia nos municipios da zona.
O comité clínico, que asesora á Xunta de Galicia na xestión da pandemia da covid-19, tomaba a decisión esta tarde do martes 20 de manter o nivel máximo de restricións no concello do Grove, que xa se atopaba nesta situación, ademais de en A Pobra do Caramiñal, Carballeda de Valdeorras, e Cualedro.
Isto supón peche total da hostalería, salvo para levar e servizo a domicilio, peche perimetral do concello e reunións limitadas a conviventes en todos os espazos.
En nivel alto de restricións pasan a estar, segundo determinou o comité, os concellos pontevedreses de Marín, Meaño, Ribadumia e Vilanova de Arousa. Ademais tamén estarán neste nivel Padrenda, Cortegada, O Barco, Rubiá, Lobeira, Muiños, Petín, Meira, Ribeira e Cambre.
Neste caso, a hostalería só poderá permanecer aberta ata as 21.00 horas pero unicamente ofrecendo servizo nas terrazas cun máximo de capacidade do 50%. As reunións poderán ser dun máximo de seis persoas en exteriores.
En nivel medio pasarán a situarse os concellos de Cambados, Catoira, Vilagarcía de Arousa, A Illa, Meis e Sanxenxo na contorna do Salnés. Ademais tamén quedan neste nivel Cangas, Gondomar, Ponteareas, Vigo, Boiro, Rianxo, Carral, Muxía, As Pontes, Ortigueira, Trabada, Barreiros, Lobios e Cartelle, segundo os datos ofrecidos pola Consellería de Sanidade.
Estes municipios verán como a hostalería só poderá ter un aforo do 50% nas terrazas e un 30% en interiores, os bares pecharán ás 21.00 horas e poderanse reunir un máximo de seis persoas en exteriores e catro en interiores destes establecementos de hostalería.
No resto dos concellos de Galicia, entre eles o de Pontevedra, continuarán as restricións fixadas no nivel medio baixo.
Estas novas medidas entrarán en vigor ás 00.00 horas do próximo venres 23 de abril. Está previsto que este mércores o conselleiro de Sanidade Julio García Comesaña acompañado polo resto de autoridades sanitarias explique con detalle as medidas adoptadas.
Engade Pontevedra Viva como fonte preferida de Google de balde
Mantente informado coas últimas noticias de actualidade.