Poio contáxiase da maxia do Nadal

Con 24 horas de atraso sobre o previsto pola choiva prevista o sábado, pero o Nadal chegou ao Concello de Poio con forza para contaxiar a maxia e ilusión das festas.

Veciños de todas as idades déronse cita este domingo na Praza do Mosteiro para inaugurar a época do Nadal.

Animación, música e sorpresas non faltaron nunha xornada que concluíu co tradicional aceso da iluminación, protagonizado este ano por persoas usuarias da Asociación Down-Xuntos Pontevedra.

Entre as sorpresas preparadas fixeron a súa aparición os Elfos do Nadal de Poio, protagonistas dos espectáculos que visitarán todas as parroquias, e tamén destacou a actuación da cantante Úrsula Pérez desde un dos balcóns do Concello.

Zancudos, fogos de luces, bengalas e até neve completaron unha velada máxica.

Coa inauguración do Nadal na Praza do do Mosteiro, inaugúranse tamén as sete Aldeas de Nadal repartidas polo municipio.

Estarán situadas concretamente na contorna dos Muíños de Samieira, no parque de Lourido, no Adro de San Salvador, Praza da Chousa de Combarro, porto de Raxó, Praza da Granxa de Campelo e na contorna da Igresia de San Martiño.

É só o punto de partida a unha intensa programación de Nadal en Poio que se prolongará até o próximo día 6 de xaneiro.