Un ano máis, os servizos de hostalería traballan nestas datas na preparación dos pratos especiais para as festas do Nadal nos hospitais de Montecelo, Provincial e Hospital do Salnés.
Realízase un traballo de equipo destinado tanto ao persoal que traballa durante estas datas como para os pacientes ingresados durante a Noiteboa, o Nadal, Noitevella, Aninovo e o día de Reis.
A área sanitaria indica que, como é habitual, os equipos formados por técnicos en dietética e nutrición, gobernantas, pinches, cociñeiros e administrativos organizan o traballo para achegar coa alimentación un factor engadido para a recuperación dos pacientes ingresados.
Desenvólvense menús saudables, equilibrados e con baixo contido graxo, coas calidades idóneas para pacientes e profesionais e coas cantidades adecuadas para garantir a saúde.
O labor previo que se desenvolve nestas datas inclúe unha revisión detallada de cada alimento en canto a contido en hidratos, lípidos e proteínas. Establécense carnes e peixes baixos en graxas con inxestas suficientes de hortalizas, vexetais e froitas. Evítanse alimentos fritos e aténdese ás calorías para evitar os excesos.
En Montecelo e no Provincial, en Noiteboa ofrécese crema de marisco, lagostinos ao vapor ou bacallau con coliflor e variedade do Nadal de sobremesa.
O almorzo de Nadal será un croissant con café con leite e zume. E a comida desa xornada consistirá nunha crema de ave, salpicón de marisco ou jarrete estofado con pataca e verduritas. A sobremesa prevista é un tronco de nadal ou piña natural.
O Hospital do Salnés ofrecerá en Noiteboa dentro da dieta basal como primeiros pratos: salpicón de marisco ou sopa de galiña e de segundo, bacalo á galega con patacas ao vapor e coliflor ou escalopines ao porto con arroz branco e champiñóns, con delicias do Nadal de sobremesa.
En Nadal está previsto pastel de atún ou crema de cabaza con gambas salteadas e, de segundo, tenreira asada con patacas e guarnición de verduras ou, como alternativa, pescada á mariñeira con puré de pataca, ademais de torta de queixo.