Desde a súa chegada ao concello, o actual goberno de Soutomaior impulsou, con éxito, a transferencia das rúas Xosé Solla, Roxelio Landeiro e Calvario.
Estes tramos da PO-264 que van desde a ponte de Ponte Sampaio até o cruzamento da Feira de Arcade, até agora eran propiedade da Xunta de Galicia e "presentaban un importante estado de deterioración" ao levar "décadas sen inversións".
Ao tratarse de rúas que non eran propiedade do Concello, "non tiñamos capacidade de actuar sobre elas", detallou o alcalde, Manu Lourenzo.
O rexedor iniciou fai máis de dous anos as xestións co goberno galego para que transferise a titularidade destes tramos, pero non foi até o pasado mes de outubro cando se empezou a abrir esa posiblidade de transferencia.
Foi tras unha reunión coa conselleira de Vivenda, María Martínez Allegue; a delegada territorial Ana Ortiz, e o director territorial da provincia de Pontevedra, José Manuel Gómez González.
O acordo establece que a Xunta se encargará de executar as obras de humanización entre Ponte Sampaio e Fonte do Conde e permitiría ao Concello a optar a fondos da Deputación para o tramo entre Fonte do Conde e Roxelio Landeiro.
Lourenzo ten claro que "con esta transferencia, Arcade dá un paso de xigante que lle permitirá modernizar o seu núcleo urbano e adaptalo aos tempos actuais", á vez que sinalou que "todos os concellos da contorna están traballando en proxectos similares e Soutomaior estaba a quedar atrás".
"Grazas a esta xestión", afirmou, "poderemos levar adiante obras que levaban máis dunha década sendo necesarias e que permitirán unha mellora importante da calidade de vida da veciñanza e dos negocios locais".