Unha muller de 71 anos, que procedía da Residencia de Vilaboa, e un home de 80 anos de idade son as dúas novas vítimas da covid-19 no Hospital Montecelo do Complexo Hospitalario Universitario de Pontevedra.
Con estas dúas novas vítimas a cifra de falecidos na área sanitaria de Pontevedra - O Salnés ascende a 59 mortes por coronavirus desde o inicio da pandemia, segundo a información facilitada pola Consellería de Sanidade. A vítima anterior neste perímetro sanitario producíase este mércores coa morte dunha muller de 80 anos tamén no Hospital Montecelo.
Con estas dúas novas vítimas, o número de persoas falecidas durante as últimas 24 horas en Galicia sitúase en 8 persoas. En Vigo perdían a vida un home de 70 anos, no Hospital Álvaro Cunqueiro, que procedía de Doralresidencias de Mos e unha muller de 85 anos, que falecía no Hospital de Povisa.
A estes casos súmase a morte dun home de tan só 56 anos, no Complexo Hospitalario de Ferrol; unha muller de 77 anos, no Hospital Virxe da Xunqueira de Cee; un home de 91 anos, no Complexo Hospitalario de Santiago e un home de 81 anos, que falecía no Complexo Hospitalario da Coruña. Todas as persoas falecidas contaban con cadros clínicos nos que figuraban enfermidades previas.
En total, en Galicia ata o momento rexistráronse 1.236 mortes pola enfermidade covid-19, segundo os datos facilitados pola Consellería de Sanidade.