A preocupación este luns 28 con motivo do apagamento xeneralizado rexistrábase nos primeiros minutos nos puntos principais de transporte.
A estación de trens presentaba unha imaxe de incerteza, as persoas sentaban no chan ou agardaban de pé, en tensión, algunha novidade en relación con alternativas para o seu transporte.
Unha responsable de ADIF comentaba a PontevedraViva que ás 13.00 horas non había xa movemento ferroviario. Un dos trens, procedente de Vigo, atopábase parado en Redondela, mentres que o procedente da Coruña tamén se atopaba paralizado en metade do traxecto.
Minutos máis tarde chegaban dous axentes da Policía Nacional para coñecer de primeira man en que situación permanecía a estación e o tráfico ferroviario.
Un dos axentes atendía un mozo que lideraba a un grupo de Donosti que viñera de turismo. O mozo mostraba a súa preocupación xa que non tiñan diñeiro en papel e, por tanto, non sabían como poderían facer para comer. O axente indicou que se trataba dunha situación de "emerxencia" e isto é unha cuestión de "humanidade". "Entendo que ningún supermercado vai negarvos comida se a pedides, se van ter que tirar moitos produtos se esta situación se mantén no tempo", tranquilizaba o axente.
Debido á demanda de moitas persoas preocupadas polo escenario, o axente sinalaba que non podía dar explicacións sobre o que estaba a pasar. "A todos colleunos por sorpresa", comentaba. "Eu xa me tiven que cambiar de camisa tres veces esta mañá porque non pairamos de ir dun punto a outro para atender todas as demandas cidadás", indicaba ante a petición de datos sobre o apagamento por parte das persoas que se atopaban na estación.
Como consecuencia da falta de actividade ferroviaria, moitos viaxeiros decidiron trasladarse ata a estación de autobuses, alí amoreábanse máis de setenta persoas na plataforma esperando a chegada dun autobús. O responsable de Monbus, Javier Lorenzo, na estación indicaba que non se suspendeu ningunha viaxe e que o seu obxectivo era reforzar o transporte. "Queremos levar a todas as persoas ás súas casas", manifestaba, preocupado ante a incidencia. "Primeiro daremos acceso ás persoas con emerxencias. Hai unha doutora de Urxencias que ten que desprazarse a Vigo para traballar e terá que ser das primeiras en subir ao autobús", apuntaba.
Ante a caída do sistema informático, no despacho de billetes indicábase que o pago da viaxe debía facerse no autobús, pero nos autobuses tampouco funcionaba o sistema de lectura de dispositivos TPV. Unha viaxeira dicía: "eu non levo diñeiro enriba, dixéronme que co móbil podía pagar en todos os sitios e mira ti…".
Desde Monbus sinalaban que a intención era permitir a entrada a todas as persoas que o precisasen aínda que non puidesen pagar. Explicaban tamén que estaban a tentar contactar con varios condutores para incrementar a flota que puidese atender a demanda de viaxeiros con destino Vigo e A Coruña. Desta forma, un autobús de transporte escolar encheuse inmediatamente para viaxar a Vigo por estrada.
Entre os viaxeiros non paraba a preocupación sobre a falta de comunicación con familiares debido a caída do sistema telefónico e de internet e a pregunta flotaba en todos os grupos que se ían formando á espera do autobús que os levase ao seu destino: pero que está a pasar?
No centro de saúde da Parda, a situación era de calma durante as primeiras horas da tarde. Dúas traballadoras de administración sinalaban que os pacientes foran moi comprensibles e xa decidiran non acudir ás consultas: "só unha parella que acudiu á PAC e unha consulta en pediatría", explicaban. "É lóxico, son conscientes de que moito non podemos facer", argumentaban ao non existir acceso á historia clínica nin ao sistema de xestión informático.
Nesta situación, os centros de saúde non poden emitir receita electrónica e só, en caso de urxencia, ofrecen receitas en papel para acudir a por un medicamento na farmacia.
Tamén o centro de saúde Virxe Peregrina mantiña a actividade baixo mínimos. Segundo indicaba o persoal durante a xornada se atenderon aqueles casos nos que non era necesario consultar o historial clínico.
Na gasolineira da avenida de Lugo, numerosos vehículos tentaban encher os depósitos. Os empregados informaban aos condutores que non era posible. "Por culpa do corte eléctrico, non funciona o servidor e non podemos atender. Esperemos que se resolva pronto", expuñan.
Algúns dos supermercados da cidade funcionaban utilizando un xerador propio. Os clientes falaban na entrada: hai que coller pilas, velas e latas. Tamén os establecementos de bazar atopáronse cunha numerosa presenza de clientes que, principalmente, requirían ese tipo de produtos: lanternas e pilas para facer fronte á noite.
Os caixeiros automáticos atopábanse inactivos e as entidades financeiras tamén pecharon as súas portas no seu horario habitual, evitando a opción de que as persoas interesadas puidesen retirar diñeiro en efectivo.
Numerosos portais atopábanse coas portas abertas e unha cuña que impedía o peche, do mesmo xeito que os garaxes de apertura mecánica tamén se atopaban abertos para permitir a entrada e saída de vehículos ao longo da xornada.
Na rúa Marquesa, un grupo de persoas reuníanse ao redor dunha radio para escoitar música e os diferentes parques infantís da cidade contaban con moitísima actividade aproveitando a xornada de calor abafante.