Convocan 49 prazas de oferta pública de emprego no Concello, 30 de quenda libre
Por Natalia Puga
Creada e actualizada
Creada e actualizada
O goberno local de Pontevedra aprobou este martes 26 de decembro, nunha reunión extraordinaria, a nova oferta de emprego público municipal, que supón a convocatoria de 49 novas prazas, 30 de quenda libre e 19 de promoción interna.
Dentro das prazas de quenda libre inclúense tres reservadas para persoas con discapacidade -dúas con discapacidade xeral e unha intelectual- e nas de promoción interna figuran dúas de mobilidade pensadas para a Policía Local.
Estas 49 prazas supoñen aproximadamente o 10% do actual persoal municipal, 493 persoas, segundo os datos facilitados polo alcalde, Miguel Anxo Fernández Lores.
Fernández Lores compareceu este martes para informar sobre esta reunión extraordinaria da Xunta de Goberno, celebrada ás nove da mañá coa presenza de todos os membros do goberno.
Esta oferta de emprego público pasou previamente pola mesa de negociación dos empregados públicos, na que se realizaron achegas e, segundo Lores, "recolléronse na súa totalidade". A pesar de todo, os representantes sindicais votaron todos en contra agás unha abstención
Nesta nova oferta, o Concello decidiu, "coa finalidade de reducir ao máximo a taxa de temporalidade", que as prazas que non se cubran en promoción interna e nas reservadas para persoas con discapacidade pasen a cubrirse con aquelas persoas que se presenten pola quenda libre, sempre dentro da mesma categoría.
Dentro desta oferta, 22 das 49 prazas convocadas correspóndense coa Policía Local, xa que nos últimos anos quedaron moitas vacantes por xubilacións. Son unha praza de intendente principal, unha de inspector principal, outra de inspector, oito de oficiais e 11 de policías.
O intendente principal é o xefe do corpo e na actualidade non hai ningún con esta categoría, pois cando Daniel Macenlle deixou o cargo para converterse en director xeral de Protección Cidadá, pasou a asumir o cargo Ángel Ruibal e logo o inspector José Manuel Duarte.
Agora, volve ocupar o cargo de responsable policial o intendente Xosé Manuel González Abal, que o deixara para ser director xeral de Recursos Humanos. A súa categoría profesional é de intendente, de modo que se abre esa praza de intendente principal, á que poderá acceder por promoción interna.
A listaxe completa de prazas inclúe, na escala de administración xeral, tres técnicos medios, dous administrativos, cinco auxiliares e catro subalternos.
Na escala de administración especial, convócanse, tres prazas de bombeiro condutor, unha praza de técnico superior en enxeñería informática, unha de aparellador, unha de asistente social, unha de enxeñeiro técnico industrial, unha de sepultureiro, unha de oficial de obras, unha de encargado de instalacións, tres de operarios e as citadas da Policía Local.
Relacionadas:
-
Aprobada unha nova oferta de emprego público no Concello de Pontevedra con 27 prazas dispoñibles
Por Oskar Viéitez |
-
O persoal municipal de Sanxenxo reforzarase con 28 traballadores
Por Redacción |
-
Persoal do Concello solicita a Ana Pontón a súa mediación co alcalde
Por Redacción |
-
O Concello de Pontevedra oferta 16 prazas do cadro de persoal en 2023
Por Redacción |
-
Prevén ampliar o cadro de persoal do Concello con 14 novas prazas
Por Redacción |
-
A oferta pública de emprego de Pontevedra amplíase con dezaseis prazas máis
Por Alejandro Espiño |
-
Modifican os métodos dos exames para acceder ás prazas convocadas polo Concello
Por Alejandro Espiño |
-
Convocan 28 prazas de oferta pública de emprego no Concello
Por Redacción |