Os prestixiosos premios Bacchus 2014 deixan 17 galardóns na D.O. Rías Baixas
Por Redacción
Un total de 28 viños da Denominación de Orixe Rías Baixas participaron na cea de gala celebrada con motivo da XII edición dos premios Bacchus 2014, na que interviñeron uns oitenta catadores nacionais e internacionais. Ademais 53 viños de Rías Baixas competiron nesta edición e 17 recibiron medallas.
Os premios Bacchus significan o pistolezo de saída aos concursos nacionais e internacionais deste 2014. Adegas da D.O. conseguiron tres medallas de ouro e catorce de prata e o presidente do Consello Regulador, Juan Gil de Araujo, sinalou que, con estas distincións, Rías Baixas espera "ser líder en calidade, que os nosos viños estean sempre entre os mellores, aínda que os nosos volumes nunca poidan equipararse aos doutras zonas de cultivo máis doado".
O xurado integrárono especialistas internacionais como Sally Easton, consultora vinícola, editora do website www.winewisdom.com e xurado en numerosos concursos internacionais de viño (Decanter World Wine Awards, International Wine and Spirits Competition); Laura Rhys, membro da Xunta Directiva de The Court of Masters of Sommeliers; Joshua Greene, director da publicación especializada Wine & Spirits Magazine (EUA); Peter Mc Combie, consultor independente para hoteis e restaurantes, crítico e educador; ou James Lawther MW, editor da revista Decanter, crítico especializado independente.
Promovido pola Unión Española de Catadores, este prestixioso concurso internacional está auspiciado pola Organización Internacional da Viña e o Viño (OIV), ademais de recibir o aval da Unión Internacional de Enólogos (UIOE), da Federación Mundial de Grandes Concursos de Viños e Espirituosos (VINOFED) e contar co recoñecemento oficial do Ministerio de Medio e Medio Rural e Mariño.