"En relación coa información solicitada, indícase que o Goberno analiza as necesidades e a rendibilidade tanto económica coma social das súas actuacións para a elaboración da súa planificación a curto, medio e longo prazo. Na devandita análise tamén se teñen en conta tanto a existencia das autoestradas de peaxe coma as disponibilidades presupostarias". Esta foi a resposta do Ministerio de Fomento á pregunta presentada no Congreso dos Deputados polo parlamentario de Esquerda Plural Joan Coscubiela en relación coa A-57. O seu contido espertou o xoves as críticas de Espazo Ecosocialista, partido que promoveu a pregunta, e agora tamén da plataforma 'Salvemos a Fracha', constituída por cidadáns contrarios ao proxecto da nova autovía.

A plataforma critica a resposta e considera que con ela a ministra, Ana Pastor, "está a demostrar que despreza e ignora os veciños afectados" e que "goberna completamente afastada da sociedade" e "non ten ningún respecto ás peticións realizadas polos veciños de Pontevedra e Vilaboa e os grupos sociais e políticos que se opoñen á autovía".

Critica que a ministra "goberna completamente afastada da sociedade"

Ante esta resposta, pide a Fomento que faga públicos os estudos de necesidades e rendibilidade que elaboraron para seguir adiante co proxecto da A-57 e cales son os argumentos sólidos e serios que encontrou para apoiar unha autovía que terá un prezo final de ao redor de 1.000 millóns de euros e ningunha vantaxe para os veciños da zona pola que pasa.

Reprochan, ademais, ao ministerio, que asegure que tivo en conta a existencia de autoestradas de peaxe cando, por lóxica, se chega a rematar todo o trazado da A-57, esta restará tráfico á autoestrada AP-9 e fai prever un necesario rescate desta.

A plataforma lamenta que na súa resposta o Ministerio ignorase as alegacións presentadas por distintos colectivos ao Estudo de Impacto Ambiental e que non obtiveron resposta na Declaración de Impacto Ambiental do primeiro tramo aprobada con nocturnidade e aleivosía agosto. Recórdalle, ao respecto, que hai unha grave afección ao Camiño de Santiago no macro nó proxectado en Vilaboa que non se incluíu nese Estudo Ambiental e que constitúe, polo tanto, unha das irregularidades denunciadas na vía contencioso-administrativa.

 'Salvemos a Fracha' insiste en que por esta nova autovía ten un forte rexeitamento veciñal en fronte e o primeiro tramo entre Vilaboa e A Hermida, en Marcón, -o único xa licitado- está recorrido no xulgado.