Os policías pontevedreses aseguran non estar "nin informados nin formados" para aplicar as novas reformas legais
Por Oskar Viéitez
Este mércores entrou en vigor o novo Código Penal e a Lei de Seguridade Cidadá, pero os sindicatos da Policía Nacional en Pontevedra aseguran que os axentes non están preparados para aplicar estas dúas novas leis que "afectan directamente á restricción dos dereitos dos cidadáns".
Desde a Unión Federal de Policía (UFP) apuntan que, “os policías asistimos atónitos á incrible falta de previsión por parte da Dirección Xeral da Policía que deixa sen información e formación aos policías que traballan todos os días na vía pública ata o mes de setembro, polo menos”. Esta situación insólita, leva aos policías a sentirse ”desprotexidos e abandonados á súa sorte pola administración”, que ten a obrigación de formalos.
Desde o Sindicato Unificado de Policía (SUP), o secretario local, Luis Calvo, informou que puxeron en marcha varios cursos, algúns deles on line, véndose desbordados pola demanda que superaba con fartura á oferta. Ademais o SUP optou por proporcionar a todos os seus afiliados un libro de consulta rápida, do mesmo xeito que fixo a UFP que facilitou aos policías unha copia do novo código e a nova lei.
"A administración non cumpre coas súas obrigacións e non concede aos funcionarios a posibilidade de recibir a formación necesaria e pertinente para que podamos cumprir co noso deber", declarou Luís Calvo.
Mentres tanto os xuíces desde este mércores esixiranlles que actúen conforme a unhas novas normas que ninguén lles explicou.