A D.O. Rías Baixas obtén a terceira colleita máis abundante da súa historia
Por Redacción
O Consello Regulador da Denominación de Orixe Rías Baixas concluíu a campaña de recollida de uva de 2015 cun rendemento medio de 7.820 quilos por hectárea, o que leva que se cumpriron as expectativas iniciais cun total de 31.917.611 quilos de uva vendimada, un 32% máis que durante o pasado ano.
O director técnico da D.O. Rías Baixas, Agustín Lago, sinala que se cumpriron as previsións en canto á cantidade prevista e á calidade da uva, que considera é moi boa tendo en conta os parámetros fundamentais de grao, máis elevado que a campaña de 2014 e con acidez máis compensada.
Os case 32 millóns de quilos recollidos converteranse en ao redor de 22 millóns de litros de viño de moi alta calidade e iso permitirá, segundo o Consello Regulador, manter os niveis de comercialización en todos os mercados abertos.
Os 5.806 viticultores inscritos contaron con condicións atmosféricas óptimas para o coidado da viña, cunha floración e callado do froito boa na primavera. A fermentación está a ser adecuada nas 169 adegas do sector. A produción da variedade Albariño, dentro das variedades brancas, segue sendo a maioritaria, representando o 96,8% do total.