Premio nacional á xestión da Atención Primaria de Pontevedra e o Salnés
Por Redacción
A xestión e organización da Atención Primaria en Pontevedra e O Salnés ven de recibir un recoñecemento sanitario nacional, a través do Premio Sanitario 2016 á Excelencia en Calidade, otorgado pola Fundación Avedis Donabedian, un dos galardóns máis prestixiosos no ámbito sanitario.
O xerente de Xestión Integrada de Pontevedra e O Salnés, Jose Manuel González Álvarez, recolleu este premio nun acto celebrado este mércores no Palau da Música de Barcelona, ante centos de invitados e coa asistencia de responsables das distintas administracións públicas, universidades e organizacións sociais.
A Fundación Avedis Donabedian, fundada no ano 1989 como entidade sen ánimo de lucro, ten como obxectivo colaborar coas organizacións cidadáns e profesionais e as institucións públicas e privadas para mellorar a calidade dos servizos sanitarios e sociais que reciben os cidadáns.
Os seus galardóns anuais premian a aquelas institucións, de diferentes ámbitos, que conten cun plan de calidade orientado á excelencia e que poidan amosar os resultados conseguidos na mellora da asistencia e a satisfacción dos usuarios.