O patrimonio dos políticos pontevedreses, ao aire
Por Alejandro Espiño
As declaracións de bens e actividades dos membros do goberno municipal e do resto de concelleiros da corporación xa son públicas. O Concello de Pontevedra, para dar cumprimento á lei de transparencia, publicou nas últimas horas o patrimonio de todos eles, seguindo o exemplo recente doutros organismos e institucións de todo o Estado.
Calquera persoa interesada pode acceder a estes datos a través da páxina web municipal, onde nun epígrafe recóllense todas as declaracións de bens e de actividades de todos os concelleiros electos na corporación municipal de Pontevedra, que foron asinadas diante do secretario do Pleno.
Nel, recóllese de forma separada o patrimonio inmobiliario dos concelleiros, diñeiro en metálico, participacións e valores en empresas, vehículos, embarcacións ou aeronaves, bens materiais que teñan un valor por encima dos 3.000 euros, seguros de vida ou plans de pensións ou dereitos de propiedade intelectual ou industrial. Tamén se declara as débedas ou hipotecas que teñan, fixando ademais a súa data de vencimiento.
Estas declaracións de bens patrimoniais non inclúen, en todo caso, datos concretos que permitan a súa identificación ou localización.
Así, o alcalde de Pontevedra, Miguel Anxo Fernández Lores declara dúas vivendas -coa súa propiedade ao 50%- cun valor conxunto de 184.764,94 euros e compradas ambas as antes de ser alcalde, sobre as que pesan senllas hipotecas duns 118.000 euros en total; ou unha leira rústica taxada aproximadamente nuns 20.000 euros e un único vehículo, un Alfa Romeo de 2005.
Ademais, ten cunha conta corrente cuxo saldo medio en 2015 elevouse a 2.058 euros e outra da que ten un 50% con 2.238 euros. Todo iso, xunto ás seis accións do Pontevedra CF e a súa participación de 6.000 euros como socio fundador da piscina olímpica de Pontemuíños, suma patrimonio en metálico, participacións e valores de 10.596 euros.
César Mosquera, cuxa declaración xa era pública polo seu cargo como vicepresidente na deputación provincial, recoñece dúas residencias e un terreo urbano sen edificar cuxa titularidade ostenta ao 50% e cun valor catastral conxunto de case 34.000 euros. Ademais, declara un Peugeot 407 comprado en 2009, un total de 9.500 euros en patrimonio mobiliario e unha hipoteca da que quedan por abonar 43.000 euros.
Tres propiedades cun valor conxunto de 125.000 euros declara, pola súa banda, Raimundo González, máis outra procedente dunha herdanza e gravada con dereito usufructo, así como case 110.000 euros entre contas correntes e obxectos de valor. Carme da Silva posúe o 50% dunha vivenda con valor catastral de 30.596, uns 35.000 euros no banco e un Ford Focus do ano 2011.
Estas declaracións de bens patrimoniais non inclúen, en todo caso, datos concretos que permitan a súa identificación ou localización
Vicente García Legísima ten unha vivenda valorada en 100.000 euros, cinco leiras rústicas en Ourense, 52.000 euros en capital mobiliario e 93.000 euros entre plans de pensións e a mutualidade da avogacía. Iso si, entre unha hipoteca e un crédito debe 87.000 euros. Carmen Fouces, doutra banda, ten o 60% dunha vivenda valorada en 110.621 euros, uns 2.000 euros no banco e unha hipoteca de 158.000 euros.
O 50% dunha vivenda de 112.000 euros, 36.000 euros entre patrimonio mobiliario e obxectos de valor e case 68.000 euros de pasivo por unha hipoteca e un crédito é o que declara Demetrio Gómez Junquera; unha cantidade similar á que queda por pagar -63.000 euros- a Anxos Riveiro pola súa hipoteca. Ten, con todo, unha vivenda de algo máis de 30.000 euros de valor catastral, un Peugeot 407 do ano 2005 e 12.200 euros no banco, aínda que case un terzo nunha conta compartida.
Pola súa banda, Pilar Comesaña posúe unha vivenda con valor catastral de 43.800, uns 2.000 euros no banco, un Nissan Micra de 2014 e un plan de pensións de 17.000 euros, mentres que Luís Bará non declara vivenda algunha, pero si un Peugeot 307 e case 19.000 euros en capital mobiliario. Tampouco posúen casa os concelleiros máis novos, Anabel Gulías e Alberte Oubiña, que aseguran contar cuns 2.000 euros no banco cada un e ela, un Citröen C3 a maiores.
MOREIRA E LUIS REI, OS DE MAIOR PATRIMONIO NA OPOSICIÓN
Tamén presentaron as súas declaracións os concelleiros da oposición. O portavoz do Partido Popular, Jacobo Moreira, posúe dúas vivendas -unha titular ao 25%- valoradas en 173.000 euros, unha leira urbana, outra rústica e unha quinta propiedade inmobiliaria, procedente dunha herdanza, todas elas na Coruña. Ademais, ten 130.000 euros entre contas correntes e obxectos de valor. Non declara hipoteca ou crédito algún.
No seu grupo, Aurora Cañizares ten unha vivenda con valor catastral de 37.516 euros, 17.000 euros entre patrimonio mobiliario e obxectos de valor e 38.000 euros en plans de pensións; Rafael Domínguez declara o 50% de dúas vivendas valoradas en 88.000 euros, 84.000 euros entre contas correntes e obxectos de valor e unha hipoteca de 107.000 euros; e María José Rodríguez Teso, o 50% dunha vivenda de 53.351 euros de valor catastral, 7.693 euros no banco, dous coches e unha hipoteca de case 63.000 euros.
Cinco propiedades inmobiliarias por valor de case 140.000 euros posúe Tomás Abeigón que, ademais, declara ter 85.000 euros en patrimonio mobiliario e catro motos; mentres que José Luis Martín ten o 50% dunha vivenda de 25.783 euros de valor catastral, 30.000 euros no banco, tres coches e un préstamo hipotecario de 80.000 euros. Cesar Abal, por último, non declara bens inmobiliarios pero si 11.500 euros en contas correntes e un coche comprado en 2005.
O portavoz do PSdeG-PSOE, Agustín Fernández, asegura ter patrimonio inmobiliario por algo máis de 44.000 euros e 5.676 en depósitos en contas correntes, xunto con débedas de 47.000 euros, procedentes dunha hipoteca e dun crédito persoal.
Unha cantidade similar en bens inmobiliarios declara Iván Puentes que, con todo, conta con 48.000 euros en contas correntes, dous coches, 30.000 euros nun fondo de investimentos e un préstamo hipotecario de 97.500 euros. A terceira edil socialista, Paloma Castro, posúe o 50% dunha vivenda de case 46.000 euros de valor catastral, 2.100 euros e unha hipoteca que ascende a 123.000 euros.
Por último, o portavoz de Marea Pontevedra, Luís Rei, declara dúas vivendas -unha delas propietario ao 50%- valoradas en 125.000 euros, 82.189 euros en depósitos bancarios, dous coches, unha biblioteca de 6.000 volumes e obras de arte. A súa compañeira, Mari Carmen Moreira, conta con 10.000 euros no banco e outro tanto en obxectos de valor e unha oitava parte dunha vivenda de case 30.000 euros de valor catastral.
E en Ciudadanos, María Rey non declara propiedade inmobiliaria algunha e asegura ter unicamente 11.580 euros en depósitos bancarios e outros 25.000 euros en obxectos de valor.
Relacionadas:
-
Hipotecas, propiedades, fondos no banco... consulta o patrimonio dos políticos pontevedreses
Por Natalia Puga |
-
A sede electrónica do Concello de Pontevedra, dispoñible desde o 1 de marzo
Por Alejandro Espiño |
-
Ultiman o 'striptease' patrimonial dos concelleiros pontevedreses
Por Alejandro Espiño |
-
O Concello publicará na súa web a declaración de bens dos seus concelleiros
Por Alejandro Espiño |