O PP abandona o pleno da Deputación en desacordo co "ditatorial" sistema de control da sesión
Por Oskar Viéitez & Mónica Patxot
Creada e actualizada
Creada e actualizada
O grupo provincial do Partido Popular abandonou este venres o Pleno ordinario da Deputación de Pontevedra para expresar o seu desacordo co "ditatorial" sistema de control da sesión. A reacción dos populares produciuse cando a corporación debatía os primeiros puntos da orde do día.
O primeiro en abandonar o Pleno enfadado foi o deputado do PP, Xosé Crespo, que esixiu unha nova quenda de palabra "por alusións", cando xa finalizara o debate do punto correspondente da orde do día, algo ao que a presidenta negouse. Entón, Crespo optou por continuar o pleno sentado entre o público "xa que non podo falar", dixo.
A continuación, despois de advertir en varias ocasións á portavoz do PP Nidia Arévalo para que axustase o contido do seu discurso ao contido da moción que debía defender, a presidenta da institución, a socialista Carmela Silva, retirou a palabra á popular. Nese momento, os deputados do PP abandonaron a sesión.
Xa nos corredores do Pazo Provincial, a portavoz popular Nidia Arévalo asegurou ante os xornalistas que a decisión do seu grupo de abandonar o Pleno non fora premeditada e xustificou este xesto como a única vía de protesta que queda "para defender a democracia" ante un "xesto moi grave", dado o "control ditatorial" que fai a presidenta dos debates. Ademais anunción que "cada vez teremos que ser máis duros á hora de facer cousas para que os cidadáns vexan como é Carmela Silva", concluíu.
Respecto ao Pleno, xa sen os deputados do PP ocupando os seus escanos, Carmela Silva valorou o abandono do PP como "triste" e sinalou que a súa actitude responde a "ordes claras do seu presidente o señor Feijóo e do señor Rueda" de que haxa "moito ruído nos plenos" co propósito de "debilitar a imaxe do goberno".
Silva acusou aos populares de "descalificar e mentir" para converter o pleno nun "circo" e que sexa "desde o primeiro momento" un "campo de batalla" en lugar dun lugar de debate de ideas.
MAREA ACUSA AO PP DE ELECTORALISMO
O deputado de Coalición Son, Xosé Lois Jácome, asegurou que desde a formación Marea "rexeitamos absolutamente a utilización da institución con fins meramente partidarios e electoralistas", unha utilizacion que segundo dixo "esta facendo o PP" dunha "maneira tan evidente".
Jácome asegurou que o grupo provincial do Partido Popular acudiu ao pleno deste venres cunha serie de mocións que "unicamente teñen como finalidade o uso partidario desta institución".
"Non atopamos sentido a que sistematicamente soliciten nas súas mocións a volta ao modelo anterior, que precisamente foi o que fixo que perdesen o goberno desta institución e que por tanto xa foi rexeitado polos cidadáns", engadiu o representante de Marea.
Relacionadas:
-
O goberno da Deputación leva ao Pleno a aprobación dun novo regulamento
Por Oskar Viéitez |
-
A Valedora do Pobo lembra ao PP que a lei dá a razón a Carmela Silva na súa regulación dos plenos
Por Oskar Viéitez | Creada e actualizada
-
Rueda censura a "falta de iniciativa política" da Deputación
Por Alejandro Espiño & Mónica Patxot |
-
O PP denuncia a perda de 110.000 euros en investimentos para a comarca por parte da Deputación
Por Redacción |