A Escola de Dermatite Atópica do Complexo Hospitalario inicia a súa actividade cun obradoiro
Por Redacción
A Escola de Dermatite Atópica do Complexo Hospitalario Universitario de Pontevedra estreouse cun taller práctico orientado ao coñecemento dos coidados da pel.
Os servizos de Dermatoloxía e Pediatría dos hospitais de Pontevedra e do Salnés, en colaboración coa Fundación para a Dermatite Atópica foron os responsables da organización deste taller da que é a segunda escola destas características en Galicia.
Na sesión desenvolvéronse charlas e coloquios informativos para os pais e os obradoiros con actividades prácticas para os menores, orientadas ao coñecemento dos coidados da pel. Participaron 15 pacientes e familiares. Desde o Complexo Hospitalario apuntan que está previsto que se desenvolvan cada tres meses.
Nos centros de saúde de Pontevedra atópase información para formar parte deste proxecto e poden inscribirse a través do correo electrónico escuela.atopia.pontevedra@gmail.com, indicando o nome e iniciais do paciente con esta patoloxía, a súa idade e o nome do facultativo que realizou o diagnóstico.
Con esta iniciativa búscase romper mitos e tópicos sobre esta enfermidade e favorecer o cumprimento do tratamento. A través da Escola de Atopía facilitaranse as ferramentas necesarias para avaliar a gravidade do eccema, alternativas terapéuticas e información sobre os coidados.
Hai ao redor de 60 escolas destas características en todo o mundo. A dermatite atópica afecta a entre un 2 e un 10% dos adultos.