O porto de Marín retirou 715 toneladas de residuos
Por Redacción
715 toneladas de residuos foron retiradas por parte da Autoridade Portuaria de Marín e Ría de Pontevedra durante o ano 2016.
A consolidación dos diferentes sistemas implantados para a recollida selectiva e reutilización de residuos, facilitou a xestión dos diferentes residuos. Deste xeito, unha vez descartados os residuos sólidos urbanos e asimilables, o 67% restante é valorizable ao estar separado en orixe.
Desde que se implantou a recollida selectiva no Porto de Marín, 2016 foi o ano no que se retirou un maior volume de residuos, xa que os sistemas de xestión fóronse facendo extensivos a un maior número de instalacións en toda a comunidade portuaria.
O maior volume de residuos separado en orixe corresponde ao papel e cartón, con 170 toneladas. O resto de material de refugallo sometido a recollida selectiva está composto principalmente por redes, burlóns, plásticos, madeira ,vidro ou envases lixeiros entre outros.
A Autoridade Portuaria leva anos implantado diversos programas de xestión ambiental sustentable. Entre eles, os barcos pesqueiros que participaron nos proxectos Nada pola Borda ou PESCAL (Pesca Sustentable en Caladoiros Limpos) seguen coa retirada do mar e depósito nos puntos autorizados de lixo como plásticos, latas, restos de redes, pneumáticos, restos de roupa, madeira, etc.
O Porto de Marín converteuse nun referente na xestión ambiental de residuos relacionados coas actividades marítimas e portuarias. Representantes da empresa Ecoembes visitaron recentemente o porto para coñecer de primeira man as diferentes experiencias aquí implantadas en materia de retirada selectiva e reciclaxe. Tamén aproveitaron para presentar o proxecto "Upcycling the oceans", unha iniciativa para recoller residuos de fondos mariños do Mediterráneo (similar ao que se fai en Marín desde hai anos) e convertelos en fío para tecidos de calidade.
Relacionadas:
-
O Porto de Marín retirou máis de 18 toneladas de lixo mariño no que vai de ano
Por Redacción |
-
A Mariña Mercante aproba o Plan Interior Marítimo do Porto de Marín
Por Redacción |
-
A Autoridade Portuaria adhírese ao decálogo contra os lixos mariños
Por Redacción |
-
A flota pesqueira de Marín retira 6.000 quilos de residuos das costas galegas
Por Redacción |
-
Un estudo calcula que o Porto de Marín xera uns 13.000 empregos na comarca
Por Oskar Viéitez |