Acométense traballos para a limpeza das praias de Lérez, Ponte Sampaio e Praceres
Por Redacción
Estes días comezaban os traballos intensivos de mantemento nos areais do municipio de cara ao período estival. Desta forma, a praia fluvial do Lérez, a de Ponte Sampaio e tamén a de Praceres están a ser melloradas polos servizos municipais con labores de limpeza, reposición e reparación de mobiliario urbano, entre outras funcións.
Na praia fluvial do Lérez, o Concello realiza tamén traballos de xardinería. O servizo de socorrismo comezará o próximo 24 de xuño e prolongarase ata o 10 de setembro. Haberá un socorrista durante todas as mañás. Durantes as tardes reforzarase o servizo con outro profesional máis nos meses de xullo e de agosto. O horario será de 12.30 a 20.30 horas interrompidamente.
O proxecto de mellora desta praia do río executarase para a próxima tempada estival cun orzamento que supera os 230.000 euros. A obra supoñerá a retirada da area e da capa xeotéxtil que a protexe dos lodos do río para instalar unha nova, con outras prestacións e repoñerase toda a area.
Está en proceso de adxudicación da concesión do quiosco da praia por un período de 5 anos, cunha concesión que irá do 1 de xuño ata o 30 de setembro, así como os domingos, festivos e sábados doutros tramos do ano.
No areal de Ponte Sampaio realizaranse traballos de limpeza e mantemento da praia tanto na zona da Xunqueira, ademais de achegas de area. O servizo de socorrismo está contratado á Cruz Vermella e será de dous profesionais durante as fins de semana e nos festivos. Comezarán o 17 de xuño.
E na praia de Praceres tamén se iniciaron os traballos con retirada de algas, que se acumulan con frecuencia na beira. Retíranse en períodos de 15 días aproximadamente. Tamén se achegará area.