Cuntis e Fuentes de Ebro, en Zaragoza, unidos polo programa 'Emplea Verde'
Por Redacción
Dúas localidades tan distantes como Cuntis e Fuentes de Ebro, en Zaragoza, traballarán da man para mellorar as opcións de empregabilidade no rural.
Ambas as dúas vilas, con menos de 5.000 habitantes, participarán da man no programa 'Emplea Verde' da Fundación Española para a Biodiversidade, con apoio do Ministerio de Agricultura e fondos europeos.
O obxectivo xeral do proxecto é o de impulsar as producións hortofrutícolas de calidade en zonas rurais, mellorando así as opcións dos veciños de atopar traballo preto de casa.
O programa Emplea Verde pretende minimizar a infrautilización dos recursos naturais nestas zonas, cun baixo número de empresas establecidas e que supón desaproveitar o valor engadido da produción agroalimentaria en zonas rurais e ben conservadas.
Para Cuntis, entrar nesta iniciativa supón continuar co traballo iniciado no curso de horta que se desenvolveu nas instalacións da Ran.
Neste caso o progama de emprego ofrecerá unha formación presencial e a distancia en hortofruticultura sustentable, a creación dunha marca de calidade que garanta a produción sustentable e a procedencia do produto, a creación dunha aplicación para dispositivos móbiles que permita xestionar eficientemente a explotación agrícola e a creación dunha plataforma virtual de comercialización.