Un obradoiro para "facer canteira de radio" no campus de Pontevedra
Por Redacción
Nas próximas semanas comezará a cuarta tempada de El Escaparate, o programa creado por alumnos da Facultade de Ciencias Sociais e da Comunicación que emite PontevedraViva Radio. Este espazo é o xerme do que nace un obradoiro radiofónico que se está a impartir no campus universitario de Pontevedra.
O obxectivo deste obradoiro, que leva por título Iniciación á creación dun programa de radio, é ofrecer ao alumnado un primeiro achegamento aos diferentes xéneros radiofónicos e espallar polo campus o "verme" pola radio.
Á fronte están os directores de El Escaparate, José Jardón e Jorge García, baixo a coordinación da profesora Aurora García.
En cada xornada, o obradoiro aborda un xénero diferente. Son trinta horas de carácter eminentemente práctico, no que se propón aos participantes unha serie de actividades que os leven a vivir un primeiro achegamento aos diferentes formatos radiofónicos como informativos, magacíns, faladoiros, debates ou entrevistas.
"É un obradoiro para estar o 90% do tempo diante do micrófono", destaca Jorge García, que explica que se ben diferentes exercicios están dirixidos a achegarlles "algunhas claves para locutar correctamente", outro dos propósitos do taller é amosar "que a radio é moito máis que poñerse diante do micro".
Con ese propósito, as diferentes sesións que se veñen desenvolvendo ao longo do presente mes compleméntanse á súa vez con encontros nos que profesionais do medio lles achegan a súa visión da radio.
Tras celebrar o pasado mércores un casting para a incorporación de novos membros ao seu equipo, El Escaparate dará comezo nas próximas semanas á súa cuarta tempada e nese senso un dos propósitos deste obradoiro é precisamente "facer canteira de radio", co propósito de espertar o interese por este medio entre o alumnado.
"A maioría dos alumnos son estudantes da facultade de primeiro curso e hai que dicir que estanos a sorprender o seu moi bo nivel", engade García dos participantes nunha iniciativa que busca tamén contribuír a "renovar pouco a pouco" un espazo promovido polo alumnado da facultade e aberto, como sinalan, á participación de toda a comunidade universitaria.
A realización por grupos, como exercicio final, do seu propio programa radiofónico servirá como peche ao que foi o primeiro dos obradoiros de Extensión Universitaria convocados pola Vicerreitoría en poñerse en marcha no presente cuadrimestre.