Catro patrullas da Policía Local, eixos do control de seguridade na Festa da Auga
Por Redacción
Desde a noite deste 15 de agosto, Vilagarcía de Arousa contará cun dispositivo de seguridade similar ao establecido durante os anos precedentes, nos que se foron rebaixando os incidentes, con motivo da celebración da Festa da Auga, que se celebra ao longo deste 16 de agosto.
Efectivos da Policía Local, Policía Nacional, Garda Civil, Emerxencias e Protección Civil actuarán coordinadamente atendendo ao Plan que foi aprobado na última Xunta Local de Seguridade, que presidía o alcalde Alberto Varela e contaba coa presenza da subdelegada do Goberno, Maica Larriba.
Este Plan está proposto pola xefatura da Policía Local de Vilagarcía e conta cun "centro de control" na sede de Emerxencias, na rúa Agustín Romeu. Alí ao redor de 20 persoa, tanto de Emerxencias como voluntarios do servizo de Protección Civil, velarán durante toda a noite deste mércores ao xoves de que non haxa incidentes de gravidade. Contarán con dúas ambulancias para casos de urxencias.
Ademais, catro patrullas da Policía Local, cun xefe accidental estarán a vixiar o centro da vila. A eles sumaranse efectivos da Policía Nacional e da Garda Civil de Tráfico, que a Subdelegación do Goberno traslada á zona para regular a actividade nas estradas.
Durante a xornada deste xoves, día central de celebración da Festa da Auga, manterase un posto de mando na praza de Galicia, na sede da Fundación Galega contra o Narcotráfico, do mesmo xeito que se estableceu durante os últimos anos para levar un control de toda a actividade.
Desde o puento de mando dirixirase ao operativo de seguridade e centralizarase a información de todos os servizos atendendo a calquera situación de emerxencia que se produza.
A actividade desenvolverase, tras a subida de San Roque, na Praza de España, rúa Edelmiro Trillo, rúa Pai Feijoo, Praza da Independencia, rúa San Roque ata a capela, co cruzamento con Ramón Cabanillas incluído. Esas rúas permanecerán pechadas á circulación do tráfico rodado ata que a actividade ces e póidase permitir o paso de vehículos.