Descartan o centro interxeracional que Ponte Caldelas pedía para a Casa da Quintán
Por Redacción
A Casa da Quintán será unicamente un centro de acollemento residencial para menores en situación de desamparo ou desprotección tutelados pola administración autonómica. Así o confirmou a Xunta de Galicia este mércores, descartando a opción proposta polo Concello de Ponte Caldelas, que prefería un centro interxeracional no que tamén se atendera a maiores.
A Xunta considera que esta casa indiana ten a estrutura "idónea" para acoller un servizo destas características e engade que con este centro "dáse resposta" a unha necesidade que existe na provincia de Pontevedra, onde as prazas para esta finalidade se atopan completas.
O inmoble está distribuído en planta baixa e dúas alturas e cunha estrutura de casa familiar, un deseño "que o converte nun recurso ideal para ofrecer un ambiente cálido e acolledor aos menores", segundo o goberno galego, que destaca que a casa dispón tamén dunha ampla zona exterior para realizar actividades ao aire libre.
Estas características técnicas, sinala a Xunta, "non fan posible" a súa convivencia cun centro de atención de persoas maiores, xa que nese caso serían precisos espazos máis amplos dos que non dispón a Casa da Quintán e outra configuración que atendese ás necesidades especiais de accesibilidade que requiren as persoas dependentes.
"Ningún centro interxeracional combina atención a menores tutelados con atención a maiores", asegura a Xunta, que recorda que o acollemento residencial de menores precisa de ambientes "tranquilos, de convivencia e estabilidade" e que faga "compatible" a escolarización de todos os nenos coa realización de actividades extraescolares e convivencia entre iguais.
Todos os centros interxeracionais que combinan escola infantil e centro de día necesitan, engade a administración autonómica, de entradas e espazos independentes para nenos e maiores dos que non dispón a Casa da Quintán.
Relacionadas:
-
A Casa da Quintán será finalmente un centro de menores
Por Redacción |
-
Andrés Díaz insiste en que a Casa da Quintán acolla un centro interxeracional
Por Redacción |
-
Política Social propón reabrir a Casa da Quintán como centro de menores tutelado
Por Redacción |
-
Ponte Caldelas volve solicitar unha entrevista coa conselleira de Política Social pola Casa da Quintán
Por Redacción |
-
O Concello e a Fundación Sálvora unen esforzos para pedir á Xunta a apertura da Casa da Quintán
Por Redacción |