Grande Marlaska agradece por carta o traballo dos funcionarios de prisións, que reclaman coordinación e medidas urxentes
Por Marisa Ciordia
O ministro do Interior, Fernando Grande Marlaska remitiu este martes 17 unha carta aos profesionais de Institucións Penais para facerlles chegar un agradecemento por "desempeñar o voso traballo con total entrega, dedicación e esforzo, por estar á altura das circunstancias en situacións difíciles e por lograr que a convivencia nos centros penais sexa a adecuada para conseguir os fins que constitucionalmente temos esixidos".
Este escrito chega nun momento no que estes profesionais están a reclamar á Dirección Xeral de Institucións Penitenciarias medidas coordinadas e urxentes para poder desenvolver a súa función nas condicións axeitadas, tanto para estes persoais como para a poboación recluída.
"Os traballadores estamos a colaborar para achegar solucións e salvagardar a saúde dos compañeiros e por engadido a dos internos, mantendo ao tempo a convivencia dentro do centro; pero para iso deben escoitarnos", sinalan fontes sindicais de ACAIP e UXT no centro penintenciario da Lama. Engaden que "a información é a que consegue que o medo non se apodere das persoas; por iso precisamos directrices claras, para poder aplicalas e trasladalas tamén aos internos para que saiban por que estamos a actuar de determinada maneira".
Dunha parte, atópanse sen as ferramentas hixiénicas e de prevención que serían necesarias para o número de funcionarios que traballan no centro. As máscaras que utilizan deben ir acompañadas dunha xustificación por parte da persoa que as usa; ou a cafetería segue estando aberta e os funcionarios comen nese recinto, aínda que respecten as distancias preventivas.
Outro exemplo desta situación contraditoria que denuncian produciuse o pasado domingo cando co estado de alarma decretado permitíase a visita de familiares. Visitas que se suspenderon ás tres e media da tarde - despois de remitirse á Subdelegación do Goberno - e que ordenou ás Forzas de Seguridade que están na prisión que redirixisen ás familias aos seus domicilios porque non se podía saír dos domicilios.
Teñen claro que a situación é complicada e que o obxectivo é "que esteamos os máximos posibles durante o máximo tempo posible" e evitar contagios para que non haxa positivos. De momento non os hai, pero tamén hai outro hándicap, que se trata dunha poboación con patoloxías e por tanto resultan convintes medidas de prevención. Por agora, procédese a baleirar un módulo ante a posibilidade de que puidese rexistrarse algún contaxio e que se leve a ese lugar; amáis os internos que regresan de permiso están a pasar catorce días no módulo de ingresos, illados no módulo de prevención.
Mentres tanto e desde o martes día 10 continúan á espera dunha resposta a unha serie de medidas básicas que expuxera o Comité de Saúde Laboral.