Moraña entrega medicamentos a domicilio e imprime material escolar para os nenos
Por Redacción
A través dun grupo de voluntarios, o Concello de Moraña comezou a distribuír polos domicilios os lotes de medicinas da farmacia do hospital que foron solicitados por cidadáns a través do departamento de Servizos Sociais.
En principio, está previsto que este servizo se manteña para atender a aqueles veciños que non se poden desprazar e para resolver posibles problemas de desabastecemento de certos medicamentos.
Desde o Concello, ademais, tamén se puxo en marcha un programa de apoio educativo para facilitar a impresión, e posterior entrega nas casas, de deberes e materiais escolares para que os cativos sigan coa súa formación no confinamento.
A medida está orientada ás familias que non teñen modo de facerse con eles.
Dentro das actuacións de protección e axuda á poboación na loita contra o coronavirus, o Concello ordenou tamén unha nova desinfección e limpeza dos puntos estratéxicos do municipio, que chegará a todo o casco urbano de Santa Lucía e á rede de contedores de lixo.
A alcaldesa de Moraña, Luisa Piñeiro, explicou que estas limpezas buscan minimizar os riscos de contaxio para contrarrestar o "lóxico tránsito" dos traballadores de actividades esenciais e dos veciños que saen a mercar produtos básicos.
"Queremos que o nivel de protección sexa o máximo posible na medida das nosas posibilidades", engadiu.
Por outra banda, e a través de Protección Civil artellouse unha iniciativa consistente na entrega de materiais elaborados por morañeses ao complexo hospitalario de Pontevedra. Así, levaron gran cantidade de máscaras, gorros e pantallas protectoras, moitas delas feitas por veciños.
Relacionadas:
-
Moraña merca máscaras reutilizables para a veciñanza
Por Oskar Viéitez |
-
Moraña reparte máscaras e luvas entre os comercios abertos durante a crise sanitaria
Por Redacción |
-
Os servizos sociais de Moraña prestan atención a 160 familias durante a corentena
Por Redacción |
-
Moraña entrega materiais de protección aos seis taxistas do municipio
Por Redacción |
-
Moraña suspende o pago de diversas taxas municipais
Por Redacción |
-
Moraña activa un protocolo para xestionar o lixo de persoas afectadas polo coronavirus
Por Redacción |