As análises descartan a presenza de cianobacterias na auga potable de Caldas
Por Redacción
As análises realizadas da auga de consumo na ETAP de Caldas ao longo do verán non detectaron a presenza de microcistinas e cianobacterias na saída da estación, como xa viña sucedendo en anos anteriores.
Nesta ocasión, ademáis das análises regulares encargadas polo Concello ao laboratorio autorizado de Espina y Delfín, encargáronse análises semanais á Estación de Hidrobioloxía do Con da Universidade de Santiago de Compostela.
Todas as análises recibidas ata agora das mostras tomadas semanalmente polo equipo da propia estación entre o 14 de xullo e o 22 de setembro non identificaron ningún taxón de células de cianobacterias, tanto nas análises microscópicas como nas análises de cianotoxinas.
Segundo sinalan os informes analíticos, non se detectou tampouco a presenza de microcistinas por enriba do límite de detección.
Tamén se realizaron análises da auga de consumo de diversos establecementos do municipio, dando o mesmo resultado negativo.
O alcalde de Caldas de Reis, Juan Manuel Rey, destacou que as análises confirman que a auga de consumo do abastecemento de Caldas non está afectada en ningún caso pola microcistina ou por cianotoxinas, a pesar das "declaracións alarmistas".
A ETAP de Caldas, destacou Rey, é unha infraestrutura municipal moderna, que conta con toda a tecnoloxía necesaria para a potabilización da auga.
Ademais dos filtros de carbono activo conta cun equipo para tratamento con ozono que non foi necesario activar este verán.
Relacionadas:
-
Caldas ten as súas augas de abastecemento libres de cianobacterias
Por Redacción |
-
Culpan ao "desleixo" das administracións do "deplorable" estado do encoro do Umia
Por Oskar Viéitez |
-
A USC estudará a incidencia das cianobacterias do encoro no proceso de potabilización da auga de Caldas
Por Redacción |