Cara a cara entre Miguel Anxo Fernández Lores e Alberto Núñez Feijóo coa covid-19 como pano de fondo
Por Alejandro Espiño
A situación da covid-19 en Galicia marcará, sen ningún xénero de dúbidas, a reunión que manterán este martes en Santiago de Compostela o alcalde de Pontevedra, Miguel Anxo Fernández Lores, e o presidente da Xunta de Galicia, Alberto Núñez Feijóo.
Este encontro forma parte da rolda de contactos prevista por Núñez Feijóo cos alcaldes das sete grandes cidades tras a súa reelección nas eleccións galegas de xullo.
A portavoz do goberno municipal, Anabel Gulías, sinalou que a maior preocupación que lle trasladará o rexedor pontevedrés ao presidente da Xunta está relacionada coa pandemia e co aumento da alerta sanitaria, que obrigou a novas restricións.
Fernández Lores prevé analizar co titular do goberno galego a posibilidade de deseñar unha "fórmula colaborativa" para que os concellos seguir prestando determinados servizos e que as administracións públicas "non nos tiremos os trastos á cabeza", apuntou Gulías.
A maiores, o alcalde trasladará a Núñez Feijóo a necesidade de abordar actuacións "fundamentais" para Pontevedra, entre elas, desatacar o proxecto do Gran Montecelo, mellorar o punto de encontro familiar ou construír o novo pavillón da Parda.
Falar "seriamente" da variante de Alba, analizar a situación das obras da estación intermodal, avanzar no saneamento da ría e na dragaxe do Lérez, mellorar os itinerarios peonís polo río Gafos tamén formarán parte da axenda municipal.
As demandas do goberno municipal de Pontevedra, segundo o seu portavoz, complétanse coa posta en marcha do transporte metropolitano, a desafectación dos terreos que ocupa a Xunta na Xunqueira de Alba ou a necesaria reapertura da delegación da CRTVG.
Dentro destes asuntos tamén terá un apartado específico a petición do alcalde para que Pontevedra teña un maior peso na programación cultural do Xacobeo 2021 e un maior apoio do executivo autonómico con respecto ao Museo de Pontevedra.
Relacionadas:
-
O Gran Montecelo, a variante de Alba e a estación intermodal centran a reunión entre Lores e Luísa Piñeiro
Por Manu Otero |
-
Núñez Feijóo confírmalle a Lores a licitación "inmediata" do Gran Montecelo por 130 millóns de euros
Por Alejandro Espiño |
-
O Concello lamenta o retraso que supón unha nova licitación das obras do Hospital Montecelo
Por Oskar Viéitez |
-
Lores pedirá unha nova xuntanza con Núñez Feijóo para acelerar os proxectos de Montecelo e da Variante de Alba
Por Anxo Lourido |