Alberto Núñez Feijóo, presidente da Xunta de Galicia, asistía na tarde deste venres á toma de posesión de José Manuel Cores Tourís como novo presidente da Autoridade Portuaria de Vilagarcía de Arousa nun acto en que non se permitiu o acceso á prensa.

O máximo mandatario autonómico sinalou como reto para o novo cargo que traballe por un porto máis operativo e eficiente. Nesta liña, pediulle a Cores Tourís, anterior delegado territorial da Xunta en Pontevedra, que incremente o calado da canle de entrada e das dársenas do porto; a reordenación interior dos espazos portuarios para gañar zona de almacenamento e profundar na diferenza entre porto comercial, industrial e o porto para a cidadanía. Outra das propostas centrouse na mellora de servizos a través de iniciativas Smart.

Núñez Feijóo garantiulle ao presidente portuario que para asumir estas propostas contará coa colaboración activa da administración autonómica, do mesmo xeito que o resto de Portos de interese xeral do Estado.

O presidente autonómico agradeceu o traballo desenvolvido por Sagrario Franco, antecesora no cargo. Destacou que o seu mandato permitira mellorar a capacidade do Porto de Ferrazo; a posta en marcha do ferrocarril ata o peirao, coa ampliación do servizo ata os peiraos Comercial e Comboa. Tamén destacou a integración lograda entre o porto e a vila. 

Ao acto tamén asistían Maica Larriba, subdelegada del Gobierno en Pontevedra; Alberto Varela, alcalde de Vilagarcía de Arousa e Alfonso Rueda, vicepresidente da Xunta de Galicia, entre outras autoridades.