"Convencemento total" do director de Ence-Pontevedra de que os tribunais garantirán a prórroga na Ría
Por María José Pita
Este martes, Antonio Casal, o director de Ence-Pontevedra, asistía á presentación das actividades que pechan a terceira edición da Aceleradora Ría de Pontevedra de empresas.
Na sede da Asociación de Novos Empresarios manifestaba, a preguntas dos xornalistas, que a empresa segue á espera de que se dite sentenza nos tres recursos aínda pendentes contra a prórroga da concesión da pasteira na Ría de Pontevedra.
A resposta a estes recursos, presentados polo Concello de Pontevedra, a Asociación para a Defensa da Ría (APDR) e a asociación ecoloxista Greenpeace, estaba prevista para finais do presente 2020. Dadas as datas nas que nos atopamos, a resolución xudicial podería demorarse.
"Dubido que antes de fin de ano haxa algo. Pero tampouco podo dicir que non porque non o sei. Ao final os tempos xudiciais son os tempos xudiciais e só eles os coñecen. Cremos que quizá cara ao primeiro trimestre teñamos información da sentenza. De momento, estamos igual", manifestaba Antonio Casal.
A decisión do Goberno estatal do pasado mes de marzo de non defender nos tribunais a permanencia de Ence en Lourizán ata o ano 2073, ao entender que a prórroga concedida polo goberno de Mariano Rajoy o 20 de xaneiro de 2016, cando xa estaba en funcións, non se axustaba a uns criterios claros, provocou un cambio na estratexia xudicial da empresa de celulosa, que se quedaba sen apoios das Administracións Públicas.
A pesar de que Ence quedou en solitario no mencionado procedemento xudicial aberto na Audiencia Nacional, impulsado polo Concello de Pontevedra, APDR e Greenpeace, o director de Ence-Pontevedra insiste en que "temos o convencemento total de que temos a razón".
"Pero fóra diso, do noso convencemento e de estar seguros e convencidos de que defendemos a nosa posición con todos os argumentos necesarios, fóra diso non sabemos nada máis", remataba Antonio Casal, á espera de que a Audiencia Nacional se pronuncie, previsiblemente nos primeiros meses do próximo 2021.
Relacionadas:
-
O comité de empresa de Ence alerta de que a fábrica paralizou os seus investimentos en Pontevedra
Por María José Pita |
-
Traballadores de Ence mobilízanse contra a Lei do Cambio Climático que pechará a fábrica no 2033
Por Manu Otero |
-
O TSXG rexeita anular a autorización ambiental de ENCE
Por Alejandro Espiño |
-
A Audiencia Nacional rexeita o intento de Ence de achegar novas probas na causa xudicial
Por Redacción |
-
ENCE recoñece estar nunha posición "menos sólida" ao non ter a defensa do Estado
Por Redacción |
-
A Cámara de Comercio, preocupada pola "inseguridad jurídica" de relevancia internacional que provoca o caso Ence
Por Mónica Patxot & Anxo Lourido |
-
Ence ve unha "falta de respecto" o cambio "arbitrario" de Costas con respecto á súa prórroga
Por Alejandro Espiño |
-
O Goberno estatal abre a vía para que se anule a concesión da prórroga de Ence ata 2073
Por Redacción | Creada e actualizada