O servizo municipal de Emerxencias de Sanxenxo realizaba durante o ano 2020 un total de 432 intervencións e 1.169 asistencias por covid. Desde o goberno local da vila turística indícase que a pandemia obrigou a que este servizo orientásese a axudar ás persoas que precisaron illamento coa realización das compras de alimentación ou farmacia, retiradas de residuos, distribución de máscaras e tamén repartición de material para familias con menores en idade escolar.

En materia de intervencións rexistráronse 111 incendios durante todo o ano; o persoal deste servizo tivo que actuar en 99 situacións de risco; en 25 rescates e en 44 accidentes de tráfico, que se viron reducidos debido ás restricións de mobilidade durante o confinamento.

O número de intervencións pasou de 479 que se rexistraron en 2019 a 432 no 2020, 47 menos. O servizo municipal tivo que utilizar un equipo de motobomba fóra do seu radio de actuación que se circunscribe a Sanxenxo, Poio e Meaño para intervir tamén en Cerdedo-Cotobade, en dúas ocasións; en Vilanova de Arousa, en tres casos; e en Meis nunha ocasión, debido á petición da Consellería do Medio Rural.

Os días con máis incidentes durante o pasado ano foron os mércores e os venres, con 76 e 66, respectivamente. Durante o 2020, este servizo de  Emerxencias comezou a utilizar a aplicación Gesparque, unha ferramenta que recolle as necesidades e os parámetros cos que traballa un parque de bombeiros. Recóllese o informe dunha intervención, o inventario de material ou mesmo o mellor roteiro para acudir ao lugar no que se está producindo algunha situación de emerxencia.