O domingo 4 de xullo a Asociación para a Defensa da Ría (APDR) celebrará a súa marcha para reclamar que a factoría de Ence abandone a Ría de Pontevedra.

O pasado ano 2020 foi o único no que se fixo un parón nesta tradición por "prudencia e responsabilidade" ante a situación sanitaria, segundo lembraba Antón Masa, o presidente da APDR, que este venres facía pública a convocatoria en rolda de prensa telemática na compaña da secretaria da Asociación, Antía Mariño.

Os participantes partirán simultaneamente das alamedas de Marín e Pontevedra ás 12:00 horas do domingo 4 de xullo e atoparanse ás portas de Ence ao carón da Ría, punto final dos percorridos e onde se concentrarán e se dará lectura a un manifesto.

Previamente, membros da Asociación repartirán folletos polas rúas de Pontevedra coas reivindicacións desta campaña baixo o título "Fóra da Ría xa!". Entre estas demandas, incídese na saúde, o respecto polos recursos naturais ou o cumprimento da normativa que posibilite o traslado inmediato de Ence. Ademais, Antía Mariño manifestaba que a desaparición da fábrica do seu actual emprazamento fomentará un "traballo sostible e compatible co medio ambiente", que é o que defende a APDR.

COA VISTA NO 22 DE XUÑO

A presentación da marcha prodúcese a poucos días de que o martes 22 de xuño a Audiencia Nacional decida o futuro da fábrica pasteira nos terreos que actualmente ocupa en Lourizán, dentro do procedemento xudicial impulsado polo Concello de Pontevedra, Greenpeace e a propia APDR.

Neste sentido, Antón Masa avanza que o martes 22 "entendemos que non se vai saber o fallo, senón que se sentará a sala que lle corresponda da Audiencia Nacional, deliberarán sobre o tema e acordarán redactar un fallo". O resultado, confía o presidente da APDR, non se vai demorar demasiado, dada a transcendencia que ten este asunto, pero en todo caso "non será cuestión de un par de días como algúns anunciaron, máis ben cuestión duns poucos meses".

Desde a APDR confían en que o fallo sexa favorable pero, de non selo, xa avanzan que recorrerán ante instancias superiores.