A APDR critica os "recursos e esforzos consumidos" por Transición Ecolóxica na mesa sobre o futuro de Ence
Por Redacción
A Asociación Pola Defensa da Ría de Pontevedra (APDR), que preside Antón Masa, emitiu un comunicado para analizar as declaracións públicas dos diferentes representantes que participaron na mesa de diálogo sobre o futuro de Ence na ría de Pontevedra, organizada polo Ministerio de Transición Ecolóxica en Madrid.
O colectivo ecoloxista considera "inaudita" a cantidade de recursos e esforzos consumidos para realizar esta reunión que, segundo expoñen, tiña como único obxectivo buscarlle acomodo a unha empresa privada que ten a obriga de cumplir a lexislación e buscar as alternativas necesarias para a súa actividade e manter os postos de traballo, expoñen desde a APDR.
Tamén cualifican de "desproporcionada" a representación por parte da empresa nesa mesa de diálogo e afirman que non entenden a razón da presenza dalgúns sectores que "nada teñen que achegar neste tema" sen especificar no comunicado a quen se refiren.
Por outra banda, desde a APDR entenden que é "desafortunada" a actitude do Ministerio de Transición Ecolóxica ao deixar en mans da Audiencia Nacional e da Xunta de Galicia a decisión da posible continuidade de Ence en Lourizán. Afirman que é un abandono de funcións da defensa do dominio público marítimo-terrestre ao inhibirse o Ministerio na esixencia do cumprimento da lexislación de Costas vixente, que limita a permanencia de actividades nestas contornas a aquelas empresas que non poidan realizar as súas funcións noutro espazo.
Ademais, denuncian o papel xogado pola Xunta de Galicia ao considerar que non defenden o dereito público e apostan pola "defensa vergoñosa" da permanencia da fábrica na súa actual localización. Aseguran, desde a APDR, que deixar en mans do goberno galego a solución á saída de Ence é "o mesmo que deixala nas mans da propia empresa" e afirman que a entidade pasteira segue rexeitando calquera alternativa que non sexa a permanencia en Lourizán.
Tamén sinalan que é Ence, e non as administracións, quen debe buscar fondos europeos para realizar o traslado e a instalación da fábrica noutro punto.
Para a Asociación pola Defensa da Ría, calquera acordo con Ence debe pasar por finalizar a actividade en Lourizán "de forma inmediata" e a recuperación do dominio público que "por Lei debería abandonar en xullo de 2018". E no caso de que a administración competente considere que en Galicia é necesaria unha fábrica de pasta de papel que, ademais, peche o ciclo de fabricación deberá abrirse un procedemento público, aberto á participación de calquera empresa do sector.
Relacionadas:
-
A APDR presenta a marcha contra Ence en vésperas da decisión da Audiencia Nacional
Por María José Pita |
-
O comité de ENCE volve á rúa para esixir avances na mesa de traballo polo futuro da fábrica
Por Manu Otero |
-
Rueda esixe no Parlamento de Galicia ao Goberno de Pedro Sánchez garantías xurídicas para a continuidade de Ence
Por Redacción |
-
A Xunta sostén que debe ser o Estado o que busque unha localización alternativa a ENCE
Por Redacción |
-
ENCE e a Xunta aceptan estudar "novos escenarios" para un posible traslado
Por Alejandro Espiño |
-
Núñez Feijóo: "Ou o Goberno cambia de opinión ou, desta vez, ENCE pecha"
Por Alejandro Espiño |
-
O PSOE agarda que a mesa de traballo sobre o futuro de ENCE sirva para "chegar a acordos"
Por Redacción |
-
Transición Ecolóxica convoca para este mércores a mesa de traballo sobre o futuro de ENCE
Por Oskar Viéitez |