Poio habilita un servizo para que os veciños reclamen contra Telefónica polos atrasos na fibra óptica
Por Redacción
O Concello de Poio habilitará un servizo de asesoramento para que a veciñanza poida presentar as súas reclamacións e consultar dúbidas vencelladas á dotación de fibra óptica.
O servizo empezará a funcionar esta semana e un técnico municipal atenderá á cidadanía todos os xoves en horario de 12.00 a 14.00 horas nas dependencias do departamento de Urbanismo, na propia Casa Consistorial.
A iniciativa impúlsase desde o departamento de Urbanismo e Promoción Económica. O edil responsable, o socialista Gregorio Agís, explica que o papel do Concello será tomar nota das reclamacións das persoas afectadas polos incumprimentos por parte da empresa Telefónica á hora de dotar de fibra óptica a determinados lugares do municipio a pesar de contar con todos os permisos e xestións que corresponden ao Concello.
Este servizo responde a unha necesidade para atopar solucións a ausencia de fibra óptica en zonas de diferentes parroquias. Agís lembra que esta empresa ten a obriga de dotar deste servizo ao 100% do municipio antes de que finalice o ano, tal e como establece o Plan Sectorial de Despegue de Banda Ancha e que o Concello se puxo en varias ocasións en contacto coa empresa para solucionar estes problemas, sen recibir resposta pola súa parte.
Nos últimos días, a Xunta de Goberno Local deu o visto bo a un proxecto para despregar a instalación de fibra a todos os fogares de Poio, co obxectivo de prestar servizo ás cinco parroquias, fomentando a libre competencia. Consistirá na posta en marcha dunha Rede Aberta que permitiría o acceso en igualdade de condicións a todos os operadores de telecomunicacións, asegurando oportunidades de xeito equitativo
Relacionadas:
-
O Concello remite a Telefónica máis de 30 solicitudes de dotación de fibra óptica
Por Redacción |
-
Recibidas máis de 20 reclamacións sobre a fibra óptica en Poio desde a apertura do punto de información municipal
Por Redacción |
-
A fibra óptica alternativa a Telefónica estenderase desde Lourido ata A Caeira
Por Redacción |
-
Poio pide á Xunta que requira a Telefónica o despregue da fibra óptica
Por Redacción |