34 empresas optan á construción do viveiro de empresas do polígono de Barro-Meis
Por Redacción
34 empresas foron admitidas no concurso de ideas que impulsa a Deputación de Pontevedra para a obra de construción do viveiro de empresas situado no polígono Barro-Meis. A creación deste viveiro de empresas permitirá fomentar, segundo a institución provincial, iniciativas empresariais ao mesmo tempo que se converte en impulso de emprendemento en toda a provincia de Pontevedra.
O proxecto enmárcase dentro do acordo que a Deputación Provincial acadou coa Fundación Incyde para a posta en marcha de dous viveiros de empresas na provincia, (xunto a este, o de Lalín) cun orzamento de 1,5 millóns de euros dos que o 80% (1,2 millóns) proceden de fondos europeos FEDER.
A través deste concurso premiarase a proposta de proxecto de obra básico, o deseño e a definición das características da obra que albergará un viveiro de empresas nas parcelas A10 e A11 do polígono industrial de Barro-Meis. Ademais da creatividade, se valorará os plantexamentos que teñan un alto valor arquitectónico e estético.
Os admitidos son arquitectos colexiados de xeito individual e equipos multidisciplinares optando a un primeiro premio de 6.000 euros, un segundo de 3.000 e un terceiro de 1.000 euros. Agora deberán proceder á presentación da súa proposta baixo un lema, nun prazo de 30 días tralo cal deliberará o xurado.