Moraña mellora a súa sinalización turística e patrimonial
Por Redacción
Coa intención de poñer en valor o seu patrimonio cultural, o Concello de Moraña levará a cabo unha actuación encamiñada a protexer esa riqueza, mellorando a sinalización dos elementos máis relevantes da vila. "Queremos facer máis accesibles todos estes elementos, coa colocación de paneis informativos que ofrezan unha información e documentación completa acerca dos mesmos”, explicou o alcalde José Cela.
Esta actuación supón unha continuación do traballo que xa se leva facendo nestes últimos tempos, nos que se instalaron xa algúns carteis destas características, con cargo a unha subvención da Deputación de Pontevedra.
O importe para os paneis que se producirán agora será superior aos 8.000 euros e destinarase aos elementos máis representativos de cada parroquia: Amil (San Mamede), Cosoirado (Santa María), Gargantáns (San Martiño), Lamas (Santa Cruz), Laxe (San Martiño), Moraña (San Lourenzo), Moraña (Santa Xusta), Rebón (San Pedro) e Saiáns (San Salvador).
Cela considera que esta información “non só serve para dar a coñecer a riqueza histórica e cultural de Moraña a aquelas persoas que nos visitan, senón tamén á propia veciñanza, xa que en moitos casos somos nós mesmos os que descoñecemos o interese e a historia que agochan os elementos que compoñen o legado do noso pasado”.
Os paneis deseñaranse con catro cores diferentes segundo a categoría: bens arqueolóxicos, etnográficos, arquitectura civil ou arquitectura relixiosa. Os materiais que se usarán son resistentes á intemperie e ao vandalismo, pero sempre harmonizando coa contorna.
Relacionadas:
-
A antiga Escola de Santa Xusta xa é a nova Casa do Maior de Moraña
Por Redacción |
-
Máis de 100.000 euros para mellorar o estado e a funcionalidade dun camiño en Rebón, Moraña
Por Redacción |
-
O Concello de Moraña adxudicará a vindeira semana a humanización da Rúa 7, que terá prioridade peonil
Por Redacción |