O supermercado Gadis máis grande de Pontevedra abre as súas portas
Por Mónica Patxot & María José Pita
Gadis estrea un novo punto de venda en Pontevedra, na rúa Benito Corbal, número 49, con esquina a Javier Puig Llamas. O supermercado abría este xoves 10 de marzo ao público no seu horario habitual, de 9 a 21.30 horas.
O establecemento, con máis de 2.200 m2 de superficie total repartidos en dúas plantas, construíuse seguindo estritos parámetros de sustentabilidade e eficiencia enerxética que van supoñer "ata un 40% de aforro de consumo de enerxía", indicaba José Luis Fernández Astray, o director de Comunicación de Gadisa retail. Trátase, ademais, do supermercado Gadis urbano máis grande de todos os que ten a firma galega.
"As modernas e amplas instalacións proporcionan un plus de comodidade aos clientes para que gocen da mellor experiencia de compra", manifestan desde a empresa. Neste sentido, destaca unha sección especial de panadería, con ampla variedade e atención ao público. Outra das novidades deste centro é a completa selección de produtos a granel e unha adega cun stock de viños das principais denominacións e países.
O novo supermercado Gadis mantén a filosofía da marca, que é ofrecer produtos frescos comprados directamente a máis de mil produtores locais. Deste xeito, nos lineais pódese apreciar unha gran presenza de produto de proximidade, o que se traduce nun apoio ao sector primario galego, un menor impacto ambiental e redución da pegada de carbono con produtos quilómetro cero, e trasladar aos clientes artigos de primeira calidade, como explicaba o director de comunicación.
Pola súa banda, o delegado de Gadisa retail en Pontevedra, Pablo Louro, engadía que neste establecemento situado no centro da cidade o cliente vai poder atopar 10.000 produtos nos seus andeis, dos cales 400 artigos son de máximo aforro sen renunciar á calidade, tanto a través da marca propia, IFA, como noutras referencias ou en produto fresco. Neste sentido, cabe destacar que o persoal de Gadis acode día a día ás principais lonxas de Galicia, onde se encarga de xestionar a compra para que vaia directamente aos supermercados sen custos de intermediarios, ofrecendo deste xeito unha vantaxe importante ao cliente en frescura e prezo, e apoiando ademais aos mercados locais.
Mónica Dasilva, responsable de centro, destacaba o bo ambiente de traballo durante os preparativos e nesta primeira xornada de apertura ao público, entre outros aspectos porque se mantén o 100% do persoal do supermercado máis pequeno que estaba situado na mesma rúa e que leva máis de vinte anos traballando en Gadis. A maiores, xeráronse novos empregos, ata alcanzar o total de 40 traballadores.
O novo supermercado Gadis ocupa dúas plantas, que se comunican por ramplas mecánicas, escaleiras e ascensores. O acceso está perfectamente adaptado a persoas con mobilidade reducida, que poderán desprazarse comodamente polas amplas instalacións.
Neste espazo estivo situado desde 1951 o garaxe Costa Giráldez, que durante décadas tamén foi gasolineira. Precisamente, desde Gadisa quíxose render unha homenaxe á que foi unha empresa emblemática de Pontevedra cunha gran fotografía que recibe ao cliente e na que vemos unha das traballadoras da gasolineira manexando un antigo forncedor. Con esta imaxe de fondo, nesta xornada inaugural, a agrupación "Gaiteiros das Rías Baixas" de Pontevedra recibía ao numeroso público que se achegou a coñecer as instalacións e realizar as súas primeiras compras.
Relacionadas:
-
O supermercado Gadis de Benito Corbal fai balance do seu primeiro ano: "Superamos os obxectivos"
Por Noticia patrocinada |
-
Lores asegura que "a cidade despega despois da pandemia" con 244 peticións de licenzas de actividade económica
Por Anxo Lourido |
-
O Gadis da Oliva é o supermercado máis barato de Pontevedra, segundo a OCU
Por Oskar Viéitez |
-
O garaxe de Costa Giráldez pecha o 24 de abril para converterse nun Gadis
Por Oskar Viéitez |
-
Gadis pide un cambio de usos da antiga gasolineira de Costa Giráldez para abrir un supermercado
Por Natalia Puga |