A Estación Termal de Ponte Caldelas pronto será unha realidade: "É un empeño persoal meu e non pararei ata conseguilo"
Por Redacción
A Estación Termal de Ponte Caldelas pronto será unha realidade. Segundo avanzou o Concello, esta semana ultimaron co estudo de arquitectura Santos-Mera o proxecto definitivo do complexo termal e nas vindeiras semanas será presentado á Xunta de Galicia e á Deputación de Pontevedra co fin de optar a Fondos Europeos.
Este proxecto ascende a uns 1,5 millóns de euros onde se contabiliza o custo da demolición da actual estrutura abandonada e dos recheos necesarios. O alcalde do municipio, Andrés Díaz, insiste en que se trata dun "proxecto realista, feito con rigor, seriedade e convencemento e cun custo asumible, pois de non conseguir fondos europeos, poderiamos incluso executalo con fondos propios. As Termas de Ponte Caldelas serán unha realidade. É un empeño persoal meu e non pararei ata conseguilo".
Tras varios anos abandonado, en 2020 o Concello dispuxo de todas as autorizacións para realizar esta obra coa que devolverán a Ponte Caldelas "o seu prestixio termal". O edificio será de pedra, sostible, integrado co entorno e aberto ó Río Verdugo. Na planta alta, con acceso dende a Avenida de Vigo, disporá dunha zona de restauración, mentres que na parte baixa aglutinará todo o espazo termal, tanto interior como exterior, no que se contemplan varias piscinas de diverso tamaño.
"A Estación Termal farase realidade porque traballamos con rigor, con seriedade, responsabilidade e, ante todo, cos pés na terra", explica Andrés Díaz, quen recalca que o proxecto que se presenta é "sensato, respectuoso co entorno no que se sitúa a carón do Río Verdugo" e que "coa súa posta en marcha suporá o impulso que precisa Ponte Caldelas a nivel económico e turístico e que, sobre todo, devolverá á vila o prestixio termal que nunca debeu perder".
Relacionadas:
-
As augas captadas nos pozos Daniela I e Daniela II obteñen a condición termal
Por Redacción |
-
As augas dos dous mananciais termais de Ponte Caldelas superan os 32 graos
Por Redacción |
-
A Estrada do Balneario de Ponte Caldelas loce a súa nova imaxe
Por Redacción |
-
Limpan o ámbito do balneario días antes de presentar o proxecto da estación termal
Por Redacción |
-
Demoler e tratar os residuos de formigón do Balneario suporá un gasto de 700.000 euros
Por Redacción |
-
A estación termal de Ponte Caldelas aspira ás axudas dos ministerios para a Transición Ecolóxica e de Turismo
Por Redacción |