A semana comezará con cortes de tráfico en Alcalde Hevia, Loureiro Crespo e Cordón por obras
Por Redacción
O centro de Pontevedra verase afectado a partir deste luns 18 de novembro, e durante toda a semana, por restricciones na circulación de vehículos por tres rúas con motivo de distintas obras. A Policía Local deseñou un dispositivo de tráfico para minimizar a incidencia destas actuacións en veciños e condutores.
Na rúa Alcalde Hevia as restriccións prolongaranse entre este luns e o venres 22 de novembro. A partir das 9.30 horas pecharase o carril de circulación en sentido de Augusto González Besada cara a Fernández Ladreda, pero quedará aberto o contrario.
Loureiro Crespo verase afectado entre o luns e xoves, en dous cortes diferenciados, pero ambos vinculados con obras de asfaltado na rúa. O luns ás 9.30 horas pecharase o acceso desde a glorieta de confluencia das rúas 12 de Novembro e Xosé Malvar en dirección a Casimiro Gómez e a antiga Comandancia da Garda Civil.
Entre o martes e o xoves o corte afectará ao carril de entrada á cidade desde a intersección entre Loureiro Crespo e a rúa Rodríguez Seoane, pero manterase aberto o carril de saída. Neste caso, a restricción de circulación comezará ás 9.30 horas do martes, pero xa quedará prohibido estacionar neste tramo de rúa desde as 17.00 horas do día anterior.
A terceira rúa afectada da semana será Cordón. Neste caso, as obras que obrigan a cortar o tráfico están relacionadas coas canalizacións de gas, pero non afectará a toda a rúa, senón tan só ao tramo comprendido entre os números 11 e 34.