Vinte e un locais participan desde este venres no duodécimo Sanxenxo Degusta Tapas
Por Redacción
Ata 31 propostas gastronómicas diferentes participarán este ano na duodécima edición do certame Sanxenxo Degusta Tapas, que se celebrará ata o próximo 19 de xuño.
Neste evento, que se presentou este mércores na Sala Nauta, apuntáronse un total de 21 establecementos de hostalería.
Os establecementos que participarán con tapas creativas e tradicionais son A Codia, Arrocería Boca do Río, Asador Aserradero, Cervecería Azor, El Puerto Cervecería, Gabbá, Gastro Bar La Cueva, Galerna Hostal, La Jugosa Burguer Bar, La Portonovesa, Lilaina, Mar do Pintor, Mesón Fontán, O Forno, Pepa A Loba, Restaurante Fidel, Restaurante O Pescador, Restaurante Xerfa, Taberna A Batea, Tapería Tenazas e Terraza del Mar.
Cada local establecerá un horario de mañá e tarde para as degustacións das tapas, que terán un prezo de 2,50 euros.
Os clientes dispoñerán dun Degusta Mapa coa localización de todos os establecementos para facilitar ao público a listaxe de locais participantes.
Todos os establecementos hostaleiros adheridos a esta edición participarán nun concurso onde o público elixirá a mellor tapa creativa e a mellor tapa tradicional.
Tan só aquelas persoas que proben tapas, en polo menos cinco locais, poderán votar a mellor tapa e o que obteña mellor puntuación será o local gañador que recibirá o diploma certificativo.
Entre os clientes realizaranse sorteos con distintos agasallos, entre eles estancias hoteis, visitas adegas ou ceas, que serán de maior valor canto maior sexa o consumo.
A alcaldesa en funcións, María Deza, destacou que esta cita está "plenamente consolidada" no calendario de actividades do municipio e serve para "poñer en valor a creatividade gastronómica con propostas de calidade e cheas de inxenio".