Familias do Villa de Pitanxo, en Bruxelas: "Viñemos aquí a pedir amparo ás institucións europeas"
Por Natalia Puga
"Viñemos aquí a pedir amparo ás institucións europeas". É o resumo que fai, desde Bruxelas, a portavoz das familias afectadas polo naufraxio do Villa de Pintanxo, María José de Pazo, tras reunirse con representantes eurodeputados de BNG, PP, Cidadáns e PNV.
De Pazo e Carolina Arévalo desprazáronse este xoves ata Bruxelas para entregar persoalmente a solicitude das familias ante a Comisión de Peticións da Comisión Europea para que se esixa a España máis información e transparencia sobre o naufraxio.
Esa solicitude trasladáronlla persoalmente á presidenta da Comisión de Peticións da Unión Europea, Dolors Montserrat (tamén portavoz do PP no Parlamento Europeo), e repetíronlla tamén ao eurodeputado do PP Francisco Millán Mon; á eurodeputada do BNG, Ana Miranda; e á vicepresidenta da Comisión de Liberdades Civís do Parlamento Europeo, Maite Pagazaurtundua, de Cidadáns; así como a representantes do PNV.
Desde Bruxelas, trasladaron que non se reuniron con representantes do PSOE porque lles comunicaron vía correo electrónico que non podían recibirlles e tampouco de Unidas Podemos porque non responderon á súa petición de reunión.
Tras todos os encontros, De Pazo manifestou a súa gratitude aos políticos que lles recibiron e escoitaron "de viva voz" as súas demandas, ademais de darlles "todo o apoio e empatía".
"Solicitamos o dereito á información, non se nos dá ningún tipo de información", reiterou a portavoz das familias, que lembrou que este venres cúmprense 5 meses desde o naufraxio do 15 de febreiro en Terranova e o Goberno tan só deulles de forma oficial "medio folio" sobre a súa postura de non baixar ao pecio do buque afundido.
Tras o encontro con Ana Miranda, a eurodeputada nacionalista deu o seu apoio á solicitude presentada na Comisión de Peticións polas representantes das familias e manifestou que lle parece "incomprensible e inxusto que as familias só atopen trabas para coñecer o sucedido durante o naufraxio".
Miranda ve "lóxico" que recorran a todas as vías para alcanzalo e tacha de "lamentable" que, por exemplo, baixouse en diversas ocasións ao Titanic, afundido fai máis dun século, pero que o Goberno español só poña trabas para baixar ao Villa do Pitanxo.
Engadiu que "do mesmo xeito que concordamos coas familias na necesidade de baixar ao pecio, concordamos coa súa reclamación de transparencia para ter toda a información a respecto das causas do naufraxio”.
Tras o encontro con Maite Pagazaurtundua, a propia eurodeputada sinalou que ve a posibilidade de realizar unha pregunta parlamentaria coas peticións dos familiares para "esixir a España que non haxa ningún tipo de neglixencia nin atraso e que a cuestións que reclaman os familiares, que son de absoluta xustiza, leven adiante".
Pagazaurtundua tamén confía en que a petición presentada ante a Comisión de Peticións sexa estimada e María José de Pazo tachou de "moi produtiva" a reunión.
Relacionadas:
-
Bruxelas tramitará de urxencia a petición das familias do Villa de Pitanxo para que o Goberno central investigue o naufraxio
Por Redacción |
-
O Papa recibirá en audiencia ás familias do Villa de Pitanxo
Por Alejandro Espiño |
-
A decepción das familias do Villa de Pitanxo tras reunirse coa ministra de Transportes: "Non foi como esperabamos"
Por Natalia Puga |
-
"O tempo acábase", avisan os familiares do Villa de Pitanxo ante a reunión coa Ministra de Transportes
Por Diego Espiño |
-
A xente do mar mostra fervor pola súa patroa
Por Oskar Viéitez & Mónica Patxot |
-
O presidente da Xunta comprométese a trasladar a Pedro Sánchez as reivindicacións das familias do Pitanxo
Por Oskar Viéitez |
-
Familias do Villa de Pintanxo reuniranse coa ministra de Transportes e insistirán na necesidade de baixar ao pecio
Por Natalia Puga |
-
Un estudo ve "plausible" baixar ao pecio do Villa de Pitanxo para investigar o naufraxio
Por Alejandro Espiño |
-
Familias do Villa de Pitanxo reuniranse con Canadá o 7 de xullo e preparan viaxes a Bruxelas e Lisboa
Por Natalia Puga |