Interceptan un camioneiro ebrio circulando de forma errática pola AP-9
Por Redacción
Un camioneiro de 59 anos foi interceptado pola Garda Civil conducindo en estado de embriaguez e de forma errática pola autoestrada AP-9, polo menos durante máis de vinte quilómetros.
A alerta sobre este condutor, natural de Vilanova de Arousa, deuna un axente do propio instituto armado que casualmente circulaba co seu coche particular xunto por detrás do camión, que ía pola autoestrada en dirección A Coruña.
Ao observar o risco que supoñía para a circulación a súa perigosa forma de conducir, o garda civil avisou á central operativa de tráfico para que unha patrulla uniformada puidese paralo.
Durante máis de vinte quilómetros, desde que se cruzou co camioneiro, o axente mantívose con prudencia detrás do camión tratando de impedir que os demais usuarios non o pasasen para evitar un posible accidente.
Tras un intento errado para que detivese a marcha na peaxe de Vilaboa, ao non atender ás indicacións que lle facía este garda civil, finalmente o camioneiro puido ser interceptado na estrada PO-531, pouco despois de abandonar a autoestrada pola saída Pontevedra Norte.
Ao ser identificado, realizóuselle a proba de alcoholemia que lanzou un resultado positivo, con 0,42 mg/l en aire expirado, o que supón unha taxa case tres veces superior á máxima permitida para a condución deste tipo de vehículos, que é de 0,15 mg/l.
O camioneiro foi notificado como un presunto autor dun delito contra a seguridade viaria, polo que pode chegar a ser condenado a unha pena de prisión de 3 a 6 meses, multa de 6 a 12 meses ou traballos en beneficio da comunidade de 31 a 90 días.
En todo caso, tamén leva aparellada a privación do dereito para conducir vehículos de motor e ciclomotores por tempo superior a un e ata catro anos.
As dilixencias instruídas entregáronse no xulgado de instrución de garda de Pontevedra, onde deberá comparecer cando sexa requirido pola autoridade xudicial.
Relacionadas:
-
Interceptan dous condutores ebrios na AP-9, un deles cuadriplicando tasa máxima
Por Redacción |
-
Conduce a súa moto ebrio, sen carné nin seguro e levando dous pasaxeiros sen casco
Por Diego Espiño |
-
Cuspe e ameaza o policía da Illa que o detivo por conducir ebrio e drogado: "Métoche unha patada na cabeza que te deixo parvo"
Por Oskar Viéitez |
-
Denuncian un taxista que circulaba ebrio facendo un servizo ata A Illa
Por Redacción |