A Mancomunidade do Morrazo instalará seis puntos limpos de proximidade na comarca
Por Redacción
A Mancomunidade de Concellos do Morrazo instalará seis puntos limpos de proximidade que permitirán a recollida selectiva de residuos especiais de mediano e pequeno tamaño.
O ente supramunicipal vén de acadar unha subvención da Consellería de Medio Ambiente destinada a este concepto, valorada en 27.000 euros, da que a Mancomunidade terá que achegar 9.114 euros máis para o financiamento da totalidade. O proxecto está cofinanciado con fondos do Ministerio para la Transición Ecológica y el Reto Demográfico.
Estes novos dispositivos de reciclaxe presentarán diversos compartimentos para a recollida de distintos residuos que carecen de sistemas ordinarios de recollida achegando así, a recollida selectiva á cidadanía e reforzando o servizo do Punto Limpo.
Estes Puntos Limpos situaranse na vía pública e dende a Mancomunidade prevese que cada municipio conte con dous a comezos do próximo ano, aínda que xa se recibiron unhas placas de lectura braille co fin de que os colectores sexan accesibles para o maior número de persoas.
Neles, a cidadanía poderá depositar, de forma independente, tubos fluorescentes, pilas e baterías, cartuchos de tinta e tóner de impresoras, pinturas, disolventes e sprays, pequenos aparellos metálicos, lámpadas de baixo consumo, pequenos e medianos RAEEs, cápsulas de café, radiografías, e CD e DVD. Despois, eses residuos serán enviados ao Punto Limpo da Mancomunidade.
Tal e como se destaca dende a Mancomunidade, o proxecto terá beneficios medioambientais e económicos, como o aumento dos ratios de recollida e xestión sostible, a redución dos gases de efecto invernadoiro xerados por carburantes tradicionais ao evitar os traslados en vehículos ao Punto Limpo, a redución dos vertidos incontrolados no medio natural, e a minimización dos custes de transporte e xestión dos residuos mal separados (depositados no colector de resto).
Relacionadas:
-
A Mancomunidade do Morrazo estrea un servicio de recollida a domicilio de residuos de gran volume
-
O novo punto limpo de proximidade poñerase en funcionamento en Adina
Por Redacción |
-
Trece concellos deixan en mans da Deputación a inspección dos seus residuos
Por Oskar Viéitez & Mónica Patxot |
-
A Mancomunidade do Morrazo recolle 540 quilos de biorresiduos no inicio da campaña 'porta a porta' na hostalaría
Por Redacción |
-
A mancomunidade do Morrazo supera o reto de Ecoembes e incrementa a reciclaxe de plásticos
Por Redacción |