Un grupo de veciños reclama ao Concello a conservación do humidal da Parda
Por Oskar Viéitez
Un grupo de cidadáns reiteraron a súa solicitude ao Concello de Pontevedra para que se preserve a zona do humidal da Parda.
Coñecida como "Xunqueira da Parda", ten unha superficie duns 8.000 metros cadrados e está situada detrás da estación do tren, xunto ao proxectado parque con pavillóns deportivos e o edificio dos xulgados.
Nun escrito dirixido ao alcalde, Miguel Anxo Fernández Lores, estes biólogos, conservacionistas, naturalistas e micólogos destacan que esta zona debe preservarse "dado o seu interese biolóxico, onde se poden observar diferentes especies tanto de flora como de fauna, que utilizan ese espazo para acubillo, alimento e cría".
Recalcan a "riqueza ambiental" destes espazos "tanto para aves como para os invertebrados, e a flora específica destes hábitats, sobre todo cando se atopan inmersos nun espazo urbano".
Estes cidadáns recoñecer ser "conscientes do crecemento urbanístico que se dá nesta zona", pero apuntan que "se presenta unha gran oportunidade de englobar este ecosistema neste espazo urbano" sempre "respectando as políticas de sustentabilidade que a sociedade demanda".
Ademais reclaman un estudo en profundidade do humidal, coa catalogación das especies, así como da xeoloxía do lugar para a súa posterior protección.