A estrada secundaria que conecta os lugares de Cardecide e Meira de Arriba, que non estaba nas condicións máis axeitadas, está a ser renovada polo Concello de Cuntis.

As obras consistiron na substitución da capa de rodadura, moi deteriorada, e a limpeza das cunetas existentes.

Realizar esta labor de mantemento, segundo o goberno municipal, evita que as escorrentas das augas pluviais danen a capa de rodadura e esta se conserve en bo estado durante máis tempo.

O investimento total destinado a estes traballos ascendeu a 20.000 euros, que foron sufragados con cargo ao Plan Concellos da Deputación de Pontevedra.

O alcalde, Manuel Campos, defende que era urxente renovar este vial porque é un camiño "moi utilizado" polos residentes, pero tamén por tractores que o utilizan para achegarse ás parcelas agrarias en explotación.

"Resolvemos así o problema das fochancas e démoslle unha solución duradeira xa que inclúe a canalización das augas da chuvia", explica o rexedor.