Un cento de palilleiras mostrarán as súas dotes para o encaixe nas Galerías da Oliva
Por Redacción
As Galerías da Oliva celebrarán este sábado 1 de abril a primeira edición da súa Xuntanza de Palilleiras, que prevé reunir un cento de mestras do encaixe de bolillo.
O evento, que terá lugar entre as 10:30 e as 13:30 horas, permitirá que o público asistente poida adquirir as distintas pezas elaboradas polas artesás e materiais para traballar que resultan bastante difíciles de adquirir noutros lugares.
Ademais, estarán expostas obras creadas por palilleiras e colectivos procedentes de Pontevedra, Vilanova de Arousa, Marín, Mos, A Lama ou Cambados.
Esta I Xuntanza de Palilleiras, organizada polo colectivo de palilleiras A Fieitiña, conta coa colaboración do Concello de Pontevedra, a través do departamento municipal de Promoción Económica, e da asociación de comerciantes das Galerías da Oliva.
Ademais, o profesor e escritor Mario Gallego Rey asinará uns libros centrados nesta arte do encaixe, que dará ata esgotar existencias, tanto ás palilleiras como aos cidadáns que se acheguen.
A concelleira de Promoción Económica, Yoya Blanco, convida a todos os pontevedreses e a pasar polas Galerías da Oliva para gozar duns traballos "que forman parte do noso acervo cultural e que, en moitos casos, son verdadeiras obras de arte".
Relacionadas:
-
As galerías Oliva, punto de encontro para os amantes do encaixe de 'bolillos'
Por Cristina Saiz & Redacción |
-
Un encontro de palilleiras para celebrar e reivindicar
Por Oskar Viéitez & Cristina Saiz |
-
O Entroido pontevedrés vívese tamén nas Galerías da Oliva con obradoiros infantís
Por Redacción |
-
O Concello impulsará accións para "encher de vida" as Galerías Oliva
Por Redacción |