Aproban a creación dun centro cultural en Acevedo e a reforma do campo da festa
Por Redacción
Anabel Gulías, voceira do goberno local, anunciaba a aprobación na Xunta de Goberno celebrada este luns do proxecto de execución para acometer a obra de reforma do centro social de Acevedo, na parroquia pontevedresa de Ponte Sampaio.
O proxecto, segundo explicou Gulías, afecta o centro actual que ten unha estrutura de "galpón" e tamén ao campo da festa. Ademais está prevista a urbanización da contorna da capela próxima e do cruceiro.
O proxecto seleccionado corresponde a Carlos Seoane, arquitecto recoñecido por colaborar co prestixioso David Chipperfield.
Para a selección da proposta realizouse un concurso e agora o Concello xa conta cun anteproxecto para acelerar os procesos administrativos que permitan acometer nun menor prazo de tempo a obra, explicou a portavoz.
Gulías insistiu en que se busca crear un novo núcleo de centralidade cos "máis altos estándares de calidade" cun espazo de estancia veciñal e coa intención de que poida acoller as festas da zona, entre outras actividades.
O anteproxecto contempla a utilización de materiais tradicionalmente galegos mantendo respecto pola contorna.
A intención do goberno local é desenvolver a reforma en dúas fases. A primeira afecta o edificio e ao campo da festa; mentres que a segundo céntrase na urbanización do espazo do cruceiro e da zona para comidas.
Relacionadas:
-
Os comuneiros de Ponte Sampaio ceden ao Concello os terreos do centro social de Acevedo
Por Alejandro Espiño |
-
Pontevedra programa investimentos que supoñerán a creación de máis de 200 postos de traballo
Por Oskar Viéitez & Diana Eiras |
-
Pontevedra suma 11 millóns máis ao orzamento municipal, que superará os 118 millóns
Por Alejandro Espiño & Mónica Patxot |