Xa hai datas para a sétima edición de Etiqueta Negra, a feira do gourmet galego. O Recinto Feiral de Pontevedra acollerá de novo este evento gastronómico, a única feira dedicada exclusivamente aos produtos galegos de alta gama, os días 11, 12 e 13 de novembro. 

Etiqueta Negra, que xa iniciou o proceso de selección dos expositores, prevé xuntar un cento de produtores. Desde que se abriu este proceso, hai apenas un mes, xa ten ocupado o 50% da súa superficie, unha mostra da forte vinculación do sector a esta feira profesional.

Un terzo das empresas confirmadas participarán por primeira vez nesta feira, organizada polo Concello en colaboración coas firmas pontevedresas Trisquelia, Era Comunicación e Ovo Publicidade. Todos eles agardan colgar en breve o cartel de completo.

Todos aqueles produtores de alimentos e bebidas de calidade feitos en Galicia teñen as portas abertas para participar en Etiqueta Negra, segundo a edil de Promoción económica, Anabel Gulías, poñendo en valor a innovación, a modernización ou a investigación en novos produtos.

Etiqueta Negra volverá a ser así un punto de encontro que para os produtores é unha "oportunidade única" para xerar relacións comerciais, propiciar o contacto directo cos consumidores, descubrir novos clientes e difundir a excelencia dos produtos gourmet galegos.

"Falamos dun sector que acapara moitísima atención e do que facemos gala no mundo", destacou Gulías, que adiantou que a feira regresará chea de novidades e actividades. Volve baixo o lema "Quero gourmet galego!", o elixido para esta edición.

Xunto coa zona expositiva, en Etiqueta Negra desenvolveranse espectáculos de cociña en directo, charlas, presentacións de empresas, de produtos e de novas liñas gourmet, degustacións, demostracións, exhibicións ou catas comentadas.

O último día, o luns 13 de novembro, aínda que o público poderá acceder á feira, será a xornada reservada para as actividades orientadas aos profesionais.

A este respecto, a edil pontevedresa adiantou que, por vez primeira, Etiqueta Negra acollerá ao grupo de traballo de gastronomía e turismo promovido polo Clúster Alimentario de Galicia, dentro da súa área de mercados e internacionalización.

Este foro privado de debate, que sairá por primeira vez de Santiago, ten como finalidade xerar un espazo de reflexión entorno ao turismo gastronómico.

Froito deste grupo de traballo, as empresas da industria alimentaria e de bebidas asociadas están a determinar as iniciativas de maior impacto e viabilidade para poñer en valor os produtos galegos e aumentar o posicionamento da marca Galicia en torno á súa gastronomía.