Moraña completará as redes de saneamento do polígono de Mirallos
Por Redacción
O polígono industrial de Mirallos, en Moraña, completará a principios de 2024 a súa rede de saneamento. Así o anunciou o alcalde, Sito Gómez, que adiantou que as obras para modernizar este sistema comezarán a próxima semana e teñen un prazo de execución de tres meses.
Esta actuación, que ten un investimento de 156.347 euros, busca mellorar as condicións deste polígono "para as industrias que están e as que poidan vir", xa que para o alcalde son un "elemento clave" para fixar poboación e seguir fortalecendo o municipio.
Na actualidade, o polígono de Mirallos conta cun servizo de saneamento intermitente que non se pode considerar como unha rede integral e ademais non chega a todas as parcelas.
Co novo proxecto, o saneamento arrancará na entrada do polígono no entronque coa estrada PO-221 e conectarase co colector das Teixugueiras, transcorrendo en dirección norte e oeste para ofrecer este servizo a todas os predios e naves existentes.
A rede incluirá o servizo ás instalacións municipais, entre elas a piscina e o campo de fútbol.
A obra contará cunhas calicatas previas para comprobar o estado dos servizos existentes e a apertura de gabias de 3,5 metros de profundidade para instalar colectores e canalizacións de PVC e os pozos de rexistro, así como as acometidas de augas residuais á rede xeral.
De xeito paralelo, procederase á dotación dunha liña separativa de augas pluviais, con conexión ás baixantes existentes e arquetas, á renovación e finalización do alumeado público nos lugares onde falta e á reposición do firme dos viais do polígono.
Relacionadas:
-
O Concello de Moraña di que o campo de fútbol de Mirallos estará en funcionamento para a vindeira tempada
Por Oskar Viéitez |
-
O pavillón de Santa Lucía terá nova cuberta antes do inverno
Por Redacción |
-
En marcha a limpeza integral das estradas provinciais de Santa Xusta e Laxe
Por Oskar Viéitez |
-
Protestas na empresa téxtil Vertifil de Moraña polo despedimento de persoal
Por Redacción |
-
Moraña recibe preto de 100.000 euros para a renovación das beirarrúas nos polígonos de Afieiras e Mirallos
Por Redacción |
-
Moraña acomete a renovación das vías internas do polígono de Afieiras
Por Redacción |