Fronte común do PP nas cidades do Eixo Atlántico para esixir a chegada dos trens Avril
Por Alejandro Espiño
Cinco dos sete representantes do Partido Popular nas grandes cidades galegas, todas as situadas no Eixo Atlántico, fixeron este sábado unha fronte común para reclamar ao Goberno a chegada da alta velocidade e a mellora dos seus respectivos servizos ferroviarios.
Así, José Manuel Rey (Ferrol), Miguel Lorenzo (A Coruña), Borja Verea (Santiago), Rafa Domínguez (Pontevedra) e Marta Fernández-Tapias (Vigo) criticaron o incumprimento nos prazos de chegada dos trens Avril ou a a escaseza de frecuencias e os atrasos que sofre a liña do Eixo Atlántico.
Recordaron que esta é a segunda liña de media distancia con máis usuarios de toda España.
"Pontevedra non está desfrutando nin aproveitándose ao 100% da alta velocidade, entre outras cousas, porque Pedro Sánchez leva moito tempo esquecéndose de Galicia", asegurou o voceiro do PP na cidade do Lérez.
Neste sentido, explicou que "non se cumpriu en tempo e forma" coa chegada dos trens Avril, que se están demorando dun "xeito insoportable", unha situación que segundo Domínguez xera "enormes atrasos" no tráfico ferroviario da cidade.
O dirixente popular esixiulle a Sánchez que "cumpra con Galicia" para que Pontevedra poida facer uso dun AVE "en condicións".
Os populares pediron ademais que se repoñan todas as frecuencias na liña ferroviaria A Coruña-Vigo porque, tres anos despois da pandemia, aínda non se volveu á situación previa; e que se poña fin á "baixa calidade do servizo", cheo de atrasos e avarías e con escaseza de frecuencias.
"Cada vez hai menos frecuencias e cada vez hai máis usuarios, polo que cómpre incidir en que moitos deles empregan o tren para ir traballar e non é de recibo que teñan que mercar o seu billete con máis de 15 días de antelación", denuncian os líderes populares.