O Pleno da Deputación aproba unha modificación de crédito para lanzar o plan provincial de infraestruturas deportivas
Por Oskar Viéitez & Mónica Patxot
A Deputación de Pontevedra aprobou no Pleno celebrado este venres unha modificación de crédito por un importe total de 4,3 millóns de euros que servirán para financiar un Plan Extraordinario de Infraestruturas Deportivas.
O voceiro do goberno provincial, Jorge Cubela, explicou que estes fondos proceden de baixas por anulacións de plans para investimentos en compostaxe do Plan Revitaliza ou en mobilidade do Plan Ágora de exercicios anteriores que ascenden a 2,3 millóns. Os 1,7 millóns restantes proceden de maiores achegas a conta sobre as previstas no concepto de cesión do IRPF.
O portavoz provincial do BNG e exvicepresidente da Deputación César Mosquera afirmou que a decisión de eliminar os fondos do Revitaliza "é francamente grave e desafortunada", xa que, segundo argumentou, os concellos da provincia quedarán desamparados para cumprir a normativa que esixe que de maneira inmediata os biorresiduos sexan recollidos de maneira separada baixo ameazas de sancións inminentes.
A sesión plenaria serviu tamén para oficializar o apoio da Deputación ás reclamacións dos rexedores que integran o pacto de Pedre para a mellora da seguridade viaria na estrada N-541 e o rexeitamento ao recurso de inconstitucionalidade interposto polo Goberno central contra a Lei de Ordenación Integrada do Litoral aprobada polo Parlamento Galego.
A moción do grupo socialista para instar ao Goberno galego á posta en marcha dun plan de investimentos a partir dos ingresos do canon de abastecemento de augo non obtivo o apoio necesario.
Relacionadas:
-
Bodegas Martín Códax obtén 600.000 euros da Deputación para implantar a agrocompostaxe
Por Oskar Viéitez |
-
A Deputación mobiliza preto dun millón de euros para transformar a estrada de Almofrei
Por Oskar Viéitez |
-
A Deputación deixa sen cartos os anteriores plans de compostaxe e mobilidade do BNG
Por Oskar Viéitez |
-
Condena "rotunda" de todas as administracións galegas ás violentas protestas dos bombeiros
Por Redacción |