O Teatro Principal acolle a estrea en Pontevedra de "Encallados", película dirixida por Alfonso Zarauza
Por Redacción
O Teatro Principal volve converterse nunha sala de cine. Será para a proxección da película Encallados, dirixida por Alfonso Zarauza e protagonizada, entre outros, polo actor pontevedrés Xulio Abonjo. A súa emisión será este mércores 29 de outubro ás 21.00 horas e, a continuación, haberá un coloquio no que estarán o director e os actores do filme, que gañou recentemente tres premios Mestre Mateo.
Encallados é unha aposta polo talento galego. Unha historia sobre un grupo de amigos enredados no difícil camiño de sacar adiante un filme, co sumario xudicial do caso Prestige como fondo. Alfonso Zarauza, premiado no Festival Internacional de Cine de Viña do Marzo 2008, dirixe nesta película a Xulio Abonjo (Alfonso), Federico Pérez (Parrulo), Ricardo de Barreiro (Andy) e Farruco Castromán (Farruco).
A película conta tamén coas aparicións de Luis Tosar, Marcos Pereiro e Patricia Vázquez.
Rodada en maio de 2012 en Santiago de Compostela, Encallados ten como punto de partida a un director de cine que ten que reinventar o guión dun filme en dúas semanas ante o tropezón financieiro da industria cinematográfica e un sistema de axudas públicas pouco operativo.
Entre el e dous recoñecidos guionistas galegos somérxense nun proceso creativo que non parece ir a bo porto. No proceso de escritura teñen que lidar coa presión do produtor, as dificultades de escribir sen caer en tópicos e o complicado de equilibrar a creatividade coas posibilidades reais de produción, ata que se decatan de que o propio proceso creativo que están a vivir ten entidade propia como historia.
A entrada para esta proxección é libre ata completar o aforamento.
Relacionadas:
-
RADIO.- A playlist de... Xúlio Abonjo: De Paco Pixiñas a Moncho Charlín
Por Marisa Ciordia |
-
Éxito da estrea en Pontevedra da película "Encallados", protagonizada por Xulio Abonjo
Por Diego Torrado |
-
Sanxenxo aposta polo cine galego: será pioneiro do circuíto 'Cinemas de Galicia'
Por Redacción |
-
Xulio Abonjo e o director cambadés Juan Galiñanes, nominados aos premios Mestre Mateo 2014
Por Alejandro Espiño |